29
41. Ad dominum Julium papam in fauorem domini Joachimi Marchionis etc. Post deuota pedum oscula beatorum Reuerentiam debitam et obedientiam filialem. Beatissime pater clementissime domine, Scribit in presentiarum Illustris dominus Joachinus Sacri Romani imperij archicamerarius princepsque elector, marchio Brandburgensis, Pomeranie, Stetinensis, Cassuborum Schlauorumque dux, Burggrauius nurinburgensis et Rugie princeps, affinis ac gener meus charissimus ad vestram Sanctitatem, eidem quoque in maxima rerum suarum perturbatione humiliter supplicatur, vt legittimis ex causis eum admodum vrgentibus, quas vestra Sanctitas ex domini marchionis principis electoris affinis generi mei litteris suorum quoque et meorum oratorum (quibus huius negotij cura demandata est) relatu haud dubio affatim intelliget, Quo sue dominationi, illustrj vestre Sanctitatis clementia opitulante, subsidiariam quandam clericorum in dominio suo degentium contribuitionem assequi liceat. Verum cum prefatus princeps elector tanto et affinitatis et cognationis vinculo adeo mihi iunctus sit, vt ope presidio ac fauore suam Serenitatem merito pro viribus adiuuare debeam, Qua de re vestram sanctitatem precibus quibus possum vehementer rogo adhortorque, Benigne dignetur dominum marchionem imperialem archicamerarium affinem generumque meum hoc tempore votj sui compotem reddere, Qua in re haud secus vestra sanctitas rem mihi faciet gratam, quam pari gratia in rem meam Sanctitas vestra id concessisset, me etiam pro Tanto Beneficio sue sanctitatj plurimum efficiet devinctum. Hijs me meorumque regnorum incolas vestre sanctitatj sacrosancteque Romane ecclesie humillime subijcio obligatissimosque commendo. Ex Arce mea regia Nykopingh die martis secunda mensis Maij Anno domini millesimo quingentesimo octauo meo regio sub signeto. 42. Ad abbates ordinis Cisterciensis almanie. Reuerende pater deuotique nobis dilectj. opere pretium semper fore duximus, Si ad dei optimi maximi Imprimis laudem cultumque propagandum res etiam Cisterciensium monasteriorum nostris vicinisque in provintiis sitorum vehementer et honore et fructu augendum curauerimus. Qua de re vestras dignitates latere nolumus Transactis temporibus illustrissimum dominum Joachinum Sacri romani imperij archicamerarium principemque electorem, marchionem Brandburgensem, Stetinensem, Pomeranie, Cassuborum Schlauorumque ducem, Burggrauium Nurinburgensem, et rugie principem, affinem generumque nostrum charissimum ad publice vtilitatis incrementum litteraria exercicia in vrbe sua franckphordia ad oderam maximis impensis erexisse. Quam vniuersitatem cum edifitiorum conspicuis substructionibus ornasset omnivarieque eruditionis professoribus splendidissimis instruxisset, instituit etiam in regulam vestri ordi-
