52
commisimus. suis verbis nostro nomine tua maiestas fidem habeat, quam deus optimus maximus ad optandos dirigat successus. Vale. Ex palatio nostro Edinburgi quarto Aprilis Anno salutis millesimo quingentesimo quinto. James Rex. Ex archetypo chartaceo cum sigillo regio cera rubra a dorso impresso, et præscriptione ex versibus 1-3 repetita usque ad vocabulum quod est Jacobus. 2. Serenissimo Et Potentissimo Principi Johanni dacie suecie Noruegie Slauorum et gothorum Regi, duci slesuiacie holsacie Stermarie et ditmerie, Comiti In Oldenbrog et delmenhorst, Auunculo nostro Charissimo, Jacobus Rex Scotorum salutem et rerum firmitatem. Reddidit nobis quinto februarij litteras tuas dilectus tibi heraldus Thomas lummysden, princeps inclitissime et Auuncule charissime, qui tuorum eciam ac tui successus nos plene cerciores effecit. gratulamur saluti tue, ac bona Regine et liberorum valetudine plurimum gaudemus. Nos eciam valere et nobis bene esse scito, Regina eciam nostra prospere quidem ac lete agit. communem omnibus felicitatem deus ipse continuet. Ad postulata tua en tibi dilectum nostrum Leonem Armorum Regem et consiliarium, cui litteras et mandata dedimus. Is animum nostrum te plenius docebit. Ceterum clemenciam tuam ac animi virtutem laudamus et veneramur, qui Rebelles Suecios subditos tuos pia castigacione ad officium reuocare, quam duriori vindicta ad maius scelus Impellere malueris. Regium profecto est, accepta eciam Iniuria pocius ignoscere quam persequi. Nam quid regno vtilius, quam subiectis indulgere, aut quid deo optimo gracius quam commissam in nos offensam petentibus remittere, vt delictorum veniam ab omnium creatore nos implorare audeamus, qui te ad felicis regni incrementa dirigat. Puer ille tuus, qui ad nos venerat, placet, viuit atque valet, et inter nostros honorarios Juuenes receptus, suorum nobilitatem probat, Et quamquam incertum sit ex pri(mi)s annis (vir)ilem etatem Judicare, placida tamen pueri indoles maturam promittit probitatem, et virum sepius prestat optimum. Vale. Edinburgj quinto Aprilis Anno Salutis Quinto supra Millesimum et quingentesimum. James Rex. Ex archetypo chartaceo cum sigillo cera rubra impresso et præscriptione ex verss. 1-3 repetita. 3. Illustrissimo et Potentissimo Principi Johanni dei gracia dacie Swecie Noruigie Slauorum et gothorum Regi duci slesuiacie holstacie stirmarie et ditmarie Comiti in oldenborg et delmenhost, Auunculo et Confederato nostro Charissimo, Jacobus eadem gracia Rex Scotorum Salutem amorem et successus optatos. Anthonius gagino ex parua egipto Comes et cetera comitatus eius gens afflicta et miseranda, dum Cristianum orbem apostolico (vt aiunt) iussu suorum more peregrinantur, Ad limites nostri regni forte adue-
