56
intelleximus vtrinque ab armis cessatum, et ad certas induciarum leges Itum, vt hoc temporis Interuallo omnis questio ad sanitatem retrahatur. Vnde Rothissay heraldum nostrum ad communem nobis fratrem et Confederatum gallorum Regem cristianissimum tunc submisimus, qui suam sublimitatem tuarum Rerum cerciorem faceret. Sed is gallorum Rex frater nobis confederatus (vt conceptum in te amorem clarius ostenderet) Montyoe ex suis armorum Regibus primum istuc venire voluit, vt ex eo scires quantum laboris ad pacem tibi firmandam, et quid auxilii ad arma a se exspectares. Qui magnis Itineribus ad lubicos primum, Inde ad tuos fines per germaniam contendisset, nisi a flandro et Romanorum regis milite nescio quid timuisset, cuius gracia ad nos properantius diuertit, hinc ad te transmissurus, vt Regis sui animum erga te presens declaret et lubicum populum ad perpetuam tecum pacem hortetur, nisi bellum quam ocium, et gallorum Regem atque confederatos principes hostes sibi quam amicos experiri malit. Nostras litteras in eandem sententiam ad lubicum habet. spero futurum, ut lubica gens ad omnem pacis condicionem te vltro sollicitet, sin minus, tantum principem tuas partes agere et defensare non incommode cognoscent. Vnde virum hunc multa experiencia clarum ab incepto ad te Itinere non duximus distinendum, qui suum principem gallorum Regem potentissimum ad tuam causam prudenter et vehementer accendit, et gratum maiestati tue impendit seruicium, Vt ex eodem plenius audies, Cui et nostro nomine credideris, ac quam poteris citissime, expeditum ad nos Remittas. Nobis restant, que in eius reditum distulimus. Illustrissime et potentissime princeps, frater auuncule et Confederate charissime, in longos et felices annos vale. Ex palacio nostro Apud Edinburghum Sexto Idus maij Anno humane Salutis septimo supra millesimum et Quingentesimum. James Rex. Paniter. Has litteras, in Epist. reg. Scot. I. 67-68 typis excusas, nos ex archetypo chartaceo, cui sigillum optime seruatum cera rubra impressum adest, iterum damus. Præscriptio in tergo cum inscriptione verss. 1-3 de verbo ad verbum congruit. 8. Illustrissimo Potentissimo et Serenissimo principj Johanni dei gracia danorum suecorum Noricorum gothorum et slauorum Regi etc. auunculo et fratri nostro confederato, Jacobus eadem gracia Scotorum rex Salutem et integram dilectionem. Litteras vestre maiestatis oratores nostri reddiderunt, Mandata enarrarunt et humanitatem vestram predicarunt, presertim decanus glasguensis, qui animo et corpore volens inseruiret, modo serenitati vestre prodesset. Montioy alteras dedit litteras, et sibi commissa nos edocuit. Haffnensis decanus ternas attulit. Inde publico cetu locutus suscepti oneris in vestra causa gracias egit, quamuis nepotem in auunculi negocio laudare minus opor-
