68
21. WIr Joachim vonn gotts gnaden Marggraue zu Brandemburg des heyligen Romischen Reichs Ertzkamerer vnnd Churfurst, zu Stettyn pomern der Cassuben vnd wenden hertzoge, Burggraue tzu Noremberg vnd furste zu Rugen, Bekennen vnnd thun kunth offintlich mit disseme briue vor allermeniglich die In sehen horen oder lesenn. Als hievornn vnnser lieber besondere Andres bilde, des durchluchtigisten fursten herren Johannsen der Reich dennemarcken Sweden Norwegen der wenden vnd Gotten konig, hertzogen zu Sleszwigk zu holsteyn Stormaren vnnd der dittmarischenn, Grauen zu Oldemburg vnd delmenhorst, vnsers lieben herren ohemen vnd vatters Marschalch mit nygles hacken zu aufror komen vnd denselben zu helsingburgh erslagen, derhalben er bey gedachte konigcliche wirde von Dennemarcken in vngenade gestanden, Haben wir gegen gedachtem vnserm herren vnd vater ein vleyssig furbett seinent halben gethann, also das sein konigcliche wirde vns zu willen vnd gefallen dy vngenade gegen Im abgestalt vnnd widerumb zu genaden genomen. Wan vnns aber gedachter Andres Bilde vleyssig gebeten Ime des kuntschafft zugeben, das wir Im nicht haben wissen abzuslahen, vnd Geben Im derhalben vnser kuntschaft In craft dits bryffs wie obstett, das die konigcli(ch)e wirde vnnser lieber herr vnd vatter vnns zuwillen vnd gefallenn vf vnser furbett dy vngenade gegen mehrgedachtem Andres bilde abgestalt vnnd widerumb zu genaden genemmen jnhalt seiner konigclichen wirde bryff vnd Sigel Im darvber gegeben one alles geuerde. TZuurkunth mit vnnserem anhangenden Ingesigel versigelt vnd Geben zu Colnn an der Sprew am tag Assumpcionis Marie Anno Nach Cristj geburt thusent Funfhundert vnnd Im achten Jare. Paategning: margrewæ yachyms breff ther han bad megh wenskaff aff kongh hans for niels hacks död. mdviij. Orig. paa Pergament. Seglet er borte.
