70
vns diselbe freuntlich bittenn, Nachdem sich vnser auch gelibter Bruder Herzog Adolff vf disem vmbschlage zurennen versagt, Das wir E. L. zu sunderm freuntlichen willenn vnd gefallenn Seiner Liebde ein Renpferdt lehnen wolten etc., Empfangen vnd freuntlich vornhommen, Vnnd thun E. L. demnach bei gegenwertigem Irem dienner vnsern Eignen Leibtzelder vberschickenn. Wir gesinnen aber Freuntlich E. L. wollenn an Iren Bruder herzog Adolffen schreiben lassen, Das Sein L. allein vnd sunst Nymanndts anderst vnsern zelder zu solchem Rennen gebrauchen, Vnd das vnns alsdann derselbe mit dem Erstenn widderumb zugeschickt werdenn muge. Wusten wir auch E. L. sambt Irem geliebtenn Brudern in Einem mehrerm freuntlich vnd Schwesterlich zu wilnfarn, weren wir gantz freuntlich erpottig vnnd gneigt, vnnd wolten E. L. solichs hinwidder in Antwurth freuntlicher meynung nicht verhaltenn. Datum Coldingen Freittags nach Trium Regum Anno etc. xlvj. Orig. paa Papir med Udskrift til Hertug Hans og Segl (det danske Vaaben). 3. 1546, 2 Mai. Was wir in Ehren vnd sunst Jder zeit mer liebs vnd guts vormugen zuuorn. Durchleuchtiger Furst, freuntlicher hertzlieber her vnnd gemahel, wir vberschicken E. L. hirneben etzlich briue Als vns heut von Gotzig Rantzaw zukommen, Solchs werdenn E. L. was Inhalts derselben Freuntlich zubefindenn habenn. Wie es auch mit vnserm Baw, dauon E. L. Wissenschafft begeren, Itzund gelegenn, haben wir E. L. nechst durch E. L. vnnd vnsers glibten Brudern hertzog Johansen etc. Jungen dem Anefelder Allenthalbenn zugeschriben, vnd wird E. L. dasselbe schreibenn numehr zukommen sein. Wir verhoffen vnns auch, das der Baw alhir Jegen E. L. zukunfft verbracht werdenn soll, Wir haben auch derhalben denn Renthmeister Jorgen Pettersen An vns verschreybenn lassenn, vnd wollen vns freuntlich verhoffenn, E. L. werden Irem vorigen Schreyben nach Ire gescheffte dahin richtenn, Das sie mit gotlicher verleyhunge Jegen die zeit, wie Ihr schreybenn meldet, widderumb alhir bei vnns Anlangen werdenn. Als vns Auch e. L. durch Cristoffer Johansen, welchenn brif wir gestern empfangen habenn, Freuntlich geschribenn vnd begeret E. L. Insunderheit von vnserm gliepten Jungenn Sohn Johansen zuuorstendigen, wie es vmb Ihn gelegen, daruf wollen wir E. L. freuntlich nit verhaltenn, Das vnser Liebster Sohn Johans durch gottes gnade allenthalben wol erhaltenn wirdt vnd gotlob teglich wol zunympt vnd Ist lustig vnd Frölich, Dauon wir dan Itzt vnsere meiste vnd groste freude haben. Der Almechtige verleyhe noch hinfurder langwirig, Der E. L. auch in leybs wolmugender gesuntheit vnd wolfart Langwirig fristen wolle, Amen. Wir haben auch gemeltem vnserm hertzlieben Sohn Ein andere Amme zugeordnet, dweil die Alte Amme hinfurder nicht fur ihn sein wolt etc.
