78
sters gesundt friedlichen zustandt vnd Christlich woll leben, dieselbig der barmhertziger getrewer gott allenthalb vns zu sonderlichen tröst vnd frewden fur und fur zur seligkeit lanckweilig wolle erhalten, hertzlich erfrewet, So hoch sein wir hinwiederumb, das wir E. Ko. Matt. vnserm gnedigen vnd freuntlichen herrnn vnd vater ausz vnbedacht vnd Kindescher einfalt erzurnet vnd bewogen, betrubt, entsetzt vnd enthrustet worden, Vnd mussen, gnediger vnd freuntlicher lieber herr vater, wol bekennen, das wir vns In diesem vbersehen vnd den Sohnlichen gehorsam, dadurch wir sollichs E. Ko. Matt. vndtertheniglich anzuzeigen schuldig gewesen, verletzt vnd vberfharen, wie wir dan auch gantz demutiglich vmb gots willen vmb veterliche gnad vnd vertzichnus bitten thuen. Vnd geloben darauff E. Ko. Matt. das wir nit allein sollicher vnbedechtigen handlung vns gentzlich abthun, hinfurter meiden, Auch von sauffen, Spielen vnd anderer vnart, datzu wir (got lob) ohn das niemals liebe noch neigung gehabt, enthalten wollen, Sondern auch E. Ko. Matt. veterlichen beuelh gemesz aller furstlichen eingetzogenen tugenth, zucht vnd messigkeit durch des allerhohesten genad vnd beistandt dermassen befleissigen, das E. Ko. Matt. ohn Jemandtz verwesisz darahn ein gnedigs vnd freuntlichs gefallen, auch ehre vnd guets haben vnd vernemen werden. Vnnd sein gleichwoll, gnediger vnd freuntlicher lieber herr vatter, E. Ko. Matt. jngeschlossen Register vnd das vnsere nit allein gleichformig, Sondern es sein auch die Kleider, szo von dem seidengewandt gemacht, noch alle beihandenn vnd verwharet, die zu E. Ko. Matt. vnd vnserer ehern notturfft wir noch eine guethe weil zugebrauchen, dieselbig auch durch vnsern lieben gewesenen höuemeister Borge Trollen, weil er diesen tag von dem hochgebornen Fursten herrn Augusto hertzogen zu Sachsen vnd Churfursten, auch hertzog Friedreichen dem printzen, vnserm freuntlichen lieben herrn Schwager vnd Bruder verlassenn, vnsern zugeordneten hoffmeister Hansz Wurwitz vberanntwartet vnd beuolhen werden sollen. Vnd gelangenn darauff nochmals ahn E. Ko. Matt. als vnsern gnedigen vnd freuntlichen lieben herrn vnd vatter, In sohnlicher demuth gar vleissig vnd vndertheniglich bittendt, E. Ko. Matt. wollen das gnedig veterlich hertz derhalb von vnsz nit abwendenn, sondern vsz veterlicher liebe vnd neigung vnsern vnbedacht diszmall gnediglich vertziehen vnd zu guete halten. Das wollen wir, gnediger herr vnd freuntlicher lieber vatter, nimmer jn vergesz stellen, sonder kegen E. Ko. Matt. als der demutiger gehorsam Sohn mit vnserm Christlichen schuldigen gebeth auch vnderthenigen willigen gehorsam vnerspartes leibs jeder zeit getrewlich verdienen, vnd sein gleichwoll von wegen der veterlichen gnedigen wärnung vnd zuchtigung vndertheniglich danckbar. Thuen domit E. Ko. Matt. als vnnserm gnedigen vnd freuntlichen liebenn herrnn vatter dem almechtigen jn seinen veterlichen gnedigen schutz mit wunschung eines frölichen heylsamen Newen jars jn gesuntheit vnd aller wolfärth durch Christum vnserm lieben herrn, zusampt vnserer gnedigen vnd freuntlichen lieben Fraw Mutter, Bruder vnd Schwester, zuerhalten vnd
