80
freuntlichenn, E. L. wolle nochmaln gemelten Iffen Möller verschreybenn lassenn, das er sich mit dem Ersten nach Koldingen begebenn muge. Das wollen wir vhm E. L. hinwider Schwesterlich vnnd freunttlich verschulden. Datum vt in literis. Paategning: Productum Hadersleben denn 5ten Septembris Ao. etc. lviij. Vberschickt einen schishunth, belangt auch ein schiffuoll Kalk. Item umb Juen müller. 14. 1558, 9 September. Dorothea vonn Gots gnadenn zu Dennemarkn, Norwegenn, der Wenden vnd Gotten Königin, Geborn zu Sachssen etc., Hertzogin zu Schleszwig, Holsteyn etc. Grefin zu Oldenburg vnnd Dellmenhorst. Was wir yderzeit Ehren liebs vnd guts vermugen zuuorn. Hochgeborner Furst, Freuntlicher gliepter Bruder, Wir habenn E. L. freuntlich schreiben, Darin vns dieselbe fur den vbersandten Schiszhundt, Auch des zugesagten Kalcks halben bruderliche dancksage thun Vnnd darnach Ifen Möller vnd noch eynen Andern Möller, wilchen E. L. fur sich ausz dem Landt zu Meissen bestelt haben, belangenn etc., Freuntlich Empfangenn vnd vernommen. Vnd were erstlich der höhen grössenn dancksage des Schiszhundts vnd Kalcks halbenn, Als wir bey Hans Stuggen E. L. zuzusenden bestelt haben etc., nit nötig gewesenn, Dann wir E. L. als vnserm besondern gliebten Brudern In deme vnd viel mehrerm, das E. L. zu Ehren vnd angenhemenn willen sein möchtt, Iderzeit Schwesterlich zu wilfarn gneigt sein. Vnd ist Ifen Möller vor etzlichen tagen alhie bey vnns Angelangtt. Was aber denn Andern Möller im Land zu Meissen betreffenn, Wilcher mitt dem Gebeude vnd Malwerck wol vhmzugehenn weisz, Derhalbenn sich E. L. gegen vns freuntlich erpiethen, So wir Ihnen bedurfftenn, vns denselben zuzusenden etc., Solich E. L. bruderlich vnd freuntlich Erpieten Ist vnns zu sunderm Angenhemen vnd Schwesterlichen gefallen, vnd bitten daruff E. L. hiemitt gantz freuntlichenn, So baltt derselbe Moller ausz Meissen bey E. L. anlangen wirt, Ewr L. wollen durch Iren Amptman Syuert Rantzowen mit demselben Möller vnsernt wegenn vhm ein geburlichen vnderhaltt lassen handlen vnd ein entlichen bescheidt, was wir Ime geben sollenn, machen lassenn, Vnd alszdann gedachten Möller an vns schickenn, So soll demselben, was Syuerdt Rantzowenn Ime vnsern wegen zugesagtt, von vns gnedigst vorreicht vnd gegebenn werden. Vnd wollen sich E. L. In deme bruderlich wilferig vnnd vnbschwert erzeigenn, Wie wir gantz freuntlicher vnd Schwesterlicher zuuorsicht sein, Das seind wir vhm E. L. als vnsern freuntlichen gliptenn Brudernn Inn Allwege hinwiderumb Schwe-
