105
vorleihunge enden vnd Eur L. vnserm vorlangen nach sehen vnd balde sprechen mugen. Gott befolhen. Datum Dorgia den Donderstag nach Exaudj Ao etc. lxj. Orig. paa Papir med Udskrift til Kongen og Segl (det danske og det saxiske Vaaben). 49. 1561, 30 Mai. Vnnser Mutterliche trew vnnd was wir ehrenn, liebs vnnd guttes vormugen zuuorn. Durchlauchtiger Furst, Freundtlicher vilgeliebter Sohn, Wir khonden Eur 1. muterlich nitpergenn, das wir dem hochgebornen Fursten vnserm freindtlichen geliebten Sohn vnnd gefattern herrnn Augusten hertzogen zu Sachsen, Churfurstenn etc. freundtlich zuerkhennen geben, Das wir nit geneigt, die hochzeit zwischen vnnser freundtlichen geliebten Tochter Frawlin Dorothea etc. Vnd hertzog Wilhelm zu Braunschweig vnnd Luneburg, auf die zeit, so gedacht hertzogken Wilhelm gepetten, zubefurdern. So werden wir doch von seiner L. sohnlich berichtet, das dieselb wegen allerhandt vngelegenheitt vnd sonderlich mit desz heiligen Romischen Reichs geschefften dermassen behindert vnd abgehalten, Das sein L. mit sonderlicher beschwer vnd obligenn abzukhommen vnd zuerscheinen, da wir die hochzeit vierzehen tag vor Michaelis nestkunfftig nit in die wircklicheit richten vnd volnziehen lassen wurden, Mitt gantz Sohnlichen vnd empstigen bitten, da wir zu ietzernantter zeit So Sein L. doch von vnnsz keines abschlags hofften, nit bedacht, Das alsdan die hochzeit Den Sontag nach Michaelis alls den funfften Monattstag Octobris nestkunfftig gewiszlich furgenommen vnd in ferrer weiterung nit gestelt wurde. Ob vns nun, freindtlicher vilgeliebter Sohn, schwer vorfallenn will die begerte zeit mutterlich zu zugebenn, Sonderlich weil wir mit der kleidunge vnd anderer noturfft also in Eyl nit fertig zu werdenn, zu dem auch dasz Frawlin gern bey vns weiter behalltenn, Vnd vnerwogen, dasz es vns wegen der wanderung vnd alters halben vnbequem zu dem wenigsten mit der hochzeit vf die nestkunfftige Fasznacht mit sonderm vorsatz vorzogen hettenn, So habenn wir doch so vleisige vnd sohnliche pitt derwegenn bey vns geschehen angesehen Vnd vor vnser person zugesagt Die hochzeit zwischen gemelten vnserm frawlin vnd hertzogk Wilhelmen etc. auf den vten tag octobrisz nestkunfftig Iren vortgang gewinnen zulassenn, Dessen wir dan Eur L. alls dem Freundtlichen vilgeliebten Sohn zur nachrichtunge mutterlich vorstendigen sollen, Vnd wollen vns zu derselben gentzlich vorhoffen, Weyl man sich allerley vngelegenheit vnd geschefft, So ewer L. vnd dem Churfursten ausz weitterm aufschub herflysen mochten, zubesorgenn, Eur L. darzu vnd vf soliche ietzerwendte zeit auch guttwillig sein werde. Vnd ist Eur L. vnser weiblichen einfalt nach nit vngelegen, dan dieselb Ire sachen darnach zurichten, das sie die Reichshandlunge vnd huldunge Im Furstenthumb holstein etc. auf soliche zeit auch zuuorrichten Vnd sich
