107
Wilhelm der Junger hertzigk zw Braunshwig vnnd Luneburg etc. wegen der ehlichen vortrawung zwischenn seiner L. vnd vnser geliebten Tochter frawlin Dorothea etc. bittlichen gelangen lassen, das haben Eur L. ausz inligendem schreiben zusehenn. Nach dem wir nun das beylager bisz auff Fasznacht nestkhunfftig gentzlichen zuuorlengern geneigt gewessen, vnd vns, wie Eur L. sohnlich zuermessen, gantz schwer vorfallen will, die ausmachunge vnd alle notturft, so sich zu solichen ehrentagen geburt, in so kurtz gesetzter zeit zuuorfertigen vnd vorarbeiten zulassen, Vnd dan auch das frawlin gern noch lenger bey vns sehen wolten, Als sein wir doch von dem Churfursten etc. vnserm freundtlichen geliebten Sohn vnd gefatter so freundtlich ersucht worden, das wir seiner L. vngelegenheit in dem, das dieselb vf ferrer erstrecken wegen des Romischen Reichs geschefften vnd andern abhaltungen personlich nit zuerscheinen, angesehen vnd vor vns gewilligt das byleger vf Michaelis zubefurdern, vnd der zuuorsicht gewesen, Weylnn solichs selbige zeit mit geringerm vnkostten zugeschehen vnd Eur L. sich derenthalben ausz Iren konigreichen nit zubegeben, Eur L. darzu auch fridlich sein werde. Weil aber villeicht nicht, Woltenn wir derhalben gegenwertigen an Eur L. lauffen lassen, freindtlich bittende vns derselben sohnliche meinung vnd vngelegenheit hierin furderlichst zueröffnen, damit wir hertzog Wilhelm etc. seiner L. begerr nach mit widerantwort zubegegnen. Vnd wollen vns zu Eur L. als dem freundtlichen geliebtenn Sohne nochmals freundtlich vorhoffen, dieselb werden behertzigen, Ob schon Eur L. die ausstheur erlegt, das gleichwoll die Sorg, Mhu vnd arbeit vns angelegen sein will, vnd das sich mittler zeit allerley geschefftt einreissenn vnd zutragen khondten, dardurch Eur L. vnd der Churfurst neben vns behindert, das ehliche beylager vff die fastnacht in die wircklicheit ergehn zulassen, vnd bitten der allerwegen Mutterlich, Eur L. wollen neben vnser beschwer vnd vngelegenheit die angestelte zeit den Sontag nach Michaelis oder drey wochen darnach zugeben vnd willigen vnd vns hiemit derselben meinunge sohnlich vorwissigen, Vns darnach wissen zurichten. Dasz sein wir vmb Eur L. als den freundtlichen geliebten sohn Muterlich zuuorschulden geneigt. Datum Coldingen den 3 Julij Ao Lxj. Dorothea von Gottes gnaden zu Dennemarck Norwegen etc. konigin, Gebornn zu Sachsen etc., Hertzogin zw Schleswigk, Holstein, Widtwe. Original paa Papir med Udskrift til Kongen og Segl (det danske og det saxiske Vaaben). 52. 1561, 6 Juli. Dorothea von Gotts gnaden zu Dennemark, Norwegenn, der Wenden vnd Gotthen konigin, Geborn zu Sachsenn etc., hertzogin zu Schleszwig, Holstein etc., Widtwe. I B. 2 H. (1853). 14
