116
wolten pergenn, Vnnd thun dieselbige dem lieben Gott zu besserung vnd ewiger wolfart treulich empfelhen. Datum Coldingen den 20ten augustj Ao. etc. 61. Udskrift: Dem hochwurdigenn hochgebornenn furstenn vnserm freundtlichenn liebenn Sohn herrn Magnussen, Bischoffen der Stifft Oszel, wick vnd Churlandt, administratorn des Stiffs Reuel, Erben zu Norwegen, hertzogen zu Schleszwig Holstein Stormarn vnnd der Dietmarschenn, Graffen zv Oldenburg vnd Dellmenhorst. Orig. paa Papir med Segl (det danske og saxiske Vaaben). Paa en indlagt Seddel. Das Stifft Reuel belangendt wirt von notten sein, Dein L. sich bey der Koniglichenn w. alles thuns erklere. Wir achtenn aber vnser einfalt nach vor rathsam, besser zu sein mit gelt vnd freundtschafft dauon abgewichen, dan mit gewalt abgetrungen. Datum vt in litteris. Bilag til Nr. 59 og 60. 1. 1561, 20 August. Dorothea von Gottes gnadenn zu dennemark Norwegenn der wenden vnd Goten Konigin, Geborn zu Sachsen etc., hertzogin zu Schleszwig, holstein etc., Grafin zu Oldenburg etc., Widtwe. Vnnsern gnedigstenn willenn zuuorn, Ehrnuestenn vnnd hochgelertenn liebenn besondern. Wir habenn aus beiden ewern schreiben, Arnszburg den 8 vnd 11 Julij datiert, mit hochem wehmut vngern vornohmmen den gefahrlichen vnnd ellenden zustande, darin ietzünder vnser Sohn hertzogk Magnusz vnd Seiner L. vnderthonen sitzenn, Vnd das S. 1. sich des Rochlosen willden lebenn noch nicht enteyserdt, Sonder mit allerley vnordentlichen leben behafftt sein solle, Wolichs vns zu sonderm schmertzen gereicht. Dan wir der freude vnd hoffnunge gelebt, Sein l. wurde vnsere so mutterliche munttliche vnd schrifftliche vormanungen zu gemuht gefurett vnd sein leben gebesserdt haben, Weyl aber nit, haben wir an sein L. hiemit zum schärpfisten schreiben lassenn, ob doch ettwas wolte frucht schaffen, Vnd gesynnen an euch gantz gnedigst, Jr wollet sein L. wie bishero hinfürter auch zu aller erbarkeit vnd furstlichen tugendt anreitzen, vnd Seiner L. in ietzigen geschwinden leufften Ja nit entseyn noch euch von derselben enteysern, Dan Jr Jme in diser Seiner Regierung mit Rhatten vnd sunst vil vortraglich sein khonden. Das wollen wir vmb euch als vnsere liebe besondere die zeit vnsers lebens mit gnedigster Forderung vnd allem guten zugedencken vnuorgessen sein. So habenn Wir auch bey der Konigl. w. vnserm freundtlichen lieben Sohn muglichs vleis befurdert, Die 50 last Roggen vnd andere noturfft vnuorzuglich nach lifflandt zuschicken
