122
ewer 1. freundtlich nit vorhalltenn, Das wir briefszeigern befolhenn, Ewer 1. freundtlichen geliebten schwester Frawlin Dorothea etc. Bra(u)ttbett vnnd andere Gereidtschafft, daran gelegen, nach zelle zubringenn. Wan wir dan gern sehenn, das solichs mit gewiser fhur zur stet gebracht werdenn muchte, So bittenn wir ewer 1. muterlich, dieselbe wollen freundtlich vnbeschweret sein, vmb allerley gefahr willen, zw gedachter gereidtschafftt ettliche geleit pferdt bisz vber die Elb oder ghen Bergerdorff (alda man vmb vnser gelt einenn wagenn bestellenn moge), Oder da es ewer 1. zugefallen, vollendt gehn Luna dem Closter vorstatten lassenn vnd sich gutwillig erzeigenn. Das sein wir vmb Eur 1. muterlichs vleis zuuorschuldenn geneigt. Datum Flensburg den letzsten Sept. Anno etc. lxj. Dorothea von Gots gnaden zu Dennemarken Norwegen etc. der wenden vnnd Gothen Konigin, Geborn zv Sachsen etc., hertzogin zu Schleszwigkh, holstein etc., Widtwe. Original paa Papir med Udskrift til Kongen og Segl (det danske og det saxiske Vaaben). 66. 1561, 28 November. Vnnser muterliche liebe vnnd was wir vber derselben trewen mer ehren liebs vnnd gutts vormugen zuuorn. Durchleuchtiger Furst, freundtlicher geliebter Sohnn, Vnns Ist Ewer L. sonlich schreiben auff Kallenburg den 23ten ditz geben von zeigern vberreicht wordenn, wölich wir dahin vormerckt, Das Ewer L. von derselben Stathalter In Lifflandt Dieterich behr zeitunge erlanget, das zwischen dem Grosfursten, dem Muscawidter, vnnd vnserm freundtlichenn geliebten Sohn hertzog Magnussen etc. auff E. L. beschehen anwerben Fridenstande erhalltenn, Vnd aber das gemelter Stathallter Dieterich behr zu weidtleufftiger vorstendigung seines vorrichten befelchs vorschriebenn, Auch das vnns Ewer L. zu desselben ankhunfft aller vmbstende gelegenheit ferrer zuberichtenn freundtlichen erpottig, Woliche zeitung vnd sonliche anzeig wir dann neben E. L. glucklichen gesundenn zustande mit muterlichen freuden vnd danck vorstandenn, Mit freundtlichem bitten, da erwendter derselben Stathallter ankhommen wirt, Ewer L. vnns sein Einpringen vnd Relation, besch(i)hnem erpieten nach, freundtlich vnuorborgen haltenn, Auch da es ohne vorhinderung anderer obligen zugeschehenn, vns mit Irem Schreibenn offte besuchen wolle, damit wir derselbenn Leibsfristunge vnnd wohlgehendt jederzeit mit freuden zuerfahrn. Solichs alles nehmmen wir von Ewer L. zw dancknehmen willenn ahn, Vnnd wollen es jn gleichem vnd sunst vmb E. L. mutterlich erwidernn. Damit wir E. L. dem Schutz gottes empfelhenn. Datum Coldingenn denn 28ten No. Ao 61. Dorothea vonn Gotts gnaden zü Dennemarcken Norwegenn der Wendenn vnd Gotthenn Konigin, Geborn zu Sachssenn etc., Hertzogin zu Schlesszwig holstein etc., Widtwe. Original paa Papir med Udskrift til Kongen og Segl (det danske og det saxiske Vaaben).
