124
E. L. vnserntwegen derselben obligende Sachenn vnd Reichsgescheffte zu nachteil einstellen vnd vorschieben soltenn, Dieweil wir zubehertzigen Ewer L. als denn Freundtlichen hertzuilgeliebten Sohne vns zu aller sohnlichen vnnd muglichenn Willfarunge geneiget zusein. Nachdem wir aber vnnser muterlich hertz nicht z Rhu begebenn noch zu fridenn stellenn khonden, Ehe vnd zuuor wir E. L. aus muterlichem gemuhte vor vnserm zuge nach dem Land zu Meisenn freundtlich gesprochenn vnnd gesehenn, So wolten wir instendig nit vnderlassenn E. L. hiemit nochmaln freundtlich zuersuchenn, Mit muterlichem vortrawenn, Dieselb vnserm Suchen aus erst erwendten vrsachenn auf diszmaln nit abschlag sonder ersettigung thun werde. Damit vns dan also E. L. mit weniger beschwer vnd vorhinderung zuwillenfahrenn, Sein wir ernstlich geneiget, Geschwigen aller vnnser vnd diser Jahrszeit vnbequemlicheit, wo fern es E. L. zuwillenn gereicht vnnd wir von derselbenn vorstendigt werdenn, vns gegen Nyburg zubegeben vnnd daselbst Ewer L. gluckliche gegenwart zu erwartenn, vngeachtet das wir E. L. wenig dienstlich sein vnd allein aus muterlicher eingepflantzter trew dieselb in allem guten gern ansprechenn muchten. Vnnd wollen E. L. gewislich glaubenn, da wir angezeigten kurtz angesetzten zug nach vnser geliebten Tochter der Churfurstin zu Sachssenn nit vorhandenn vnd Irer L. doch mit vnsernn grosen vnstatten vnnd beschwer vollendt vf diszmal nit zusage gethonn hettenn, Das wir E. L. als dem freundtlichen hertzliebsten Sohne mit Mutterlichenn freudenn vnnd vorlangen nach Copenhagenn vnnd noch vil weitter zuvolgen begirig, da wir schonn soliche Rays mit leibes vnd sunst groser gefahr fuhrnemmen solten, Vnnd bittenn derhalben E. L. gantz mutterlich, die wollenn vnns bey Briefszeigernn vnseumlich vorstendigenn, Ob es derselbenn wolgefalligk, das wir vnns nach Nyburg schleinigst zuuorfugenn vnd auf wolichen tag wir daselbst zuerscheinen, So sein wir des freundtlichen erbietenns, Da wir auff E. L. tagsatzunge anlangen vnd aber der windt E. L. nach Nyburg nit fugenn würde, vns in dem Namen gots vf den Beldt zubegebenn vnnd zu E. L. gehnn Korszoer zükhommenn, Derhalben vnnser vleisig suchenn, E. L. vns derselbenn gemutte vnnd meinunge bey briefszeigern vnuorzuglich wollenn zu schreibenn, Vnnsz darnach haben zurichtenn. Wollenn vns damit in E. L. sohnlich trew hertz muterlich empfolhen haben, vnnd wir sein E. L., dero wir ein gluckselig Newes vnd vil volgunder guter Jar wunschen, zu allenn gefelligen diensten in ehren freundtlichenn geneigt. Datum Coldingen denn 2ten January Anno 62. Dorothea vonn Gots gnaden zu Dennemark Norwegenn der Wenden vnd Gothenn Konigin etc. Widtwe. Orig. paa Papir med Udskrift til Kongen („cito, cito") og Segl (det danske og det saxiske Vaaben).
