136
liebs vnnd guts vormugen zuuorn. Durchleuchtiger furst, freundtlicher geliebter Sohn, Es hat vns der gestrenge vnser lieber besonder Herloff Troll etc. Eur L. sohnlich schreibenn vberandtwort vnd daneben bericht eingebracht, wes Er neben andern E. L. zugeordneten gesandten Jn lifflandt vorrichtet, Vnnd woran sich die Auszbeute mit Sonneburg vnnd Churland gestutzet. Das nun aber der hochgeborne furst vnser freundtlicher lieber Sohnn herr Magnus bischoffe etc. ye lenger ye mehr in müheseligem stande sich wältzet vnd zu gentzlichem vorderb und emblösung Seiner L. noturfftigen vnderhalt gereichet, Das haben wir zum theil aus Seiner L. an vns gethonem flehen vnd schreiben nit ohne geringe betrubnus vnd bekhumertem schmertzen eingenohmen, Jnbehertzigung das wir der tröstlichen hoffnung vnd zuuorsicht gelebt, wir solten von ferrnerm vberlauff vnnd beschwerung des orts hero vorschonet vnd gentzlichen vbersehenn worden sein, nachdeme wir vor vnser personn vber muterlichs vormugen ye nichs manglen noch entstehn lassenn, So zu obgemelts vnsers Sohns auffkhommen, gedey vnd wolfart zugelangenn, Das wir demnach seiner L. ietzo vnd fürder mit vnserm einfaltigen Rhat vnd beystande nit mer ersprieslich sein vnd helffen konnen. Dieweil vns aber solicher zustande vnd Ellendt, wie E. L. sohnlichen zuermessenn, aus eingepflantzter liebe vnd vorwandtnus zuhertzen gehet vnd bekhummerlich vorfalt, Als konnen wir nit vnderlassenn E. L. derhalben hiemit muterlich zubelangenn, Damit wir dardurch derselbenn wolmeinlich bedencken vorursachen vnd vns hierin Jres Rhats belernen mochtenn. Ob wir dann wol wissenn mugen, das E. L. als der getrewe Bruder an bruderlicher hilfferzeigung vnd vorschub alles gedeys sich freundtlich vnd getreulichst erzeiget (Daruor auch derselben geliebter bruder obgedacht zum hochsten danckpar), So wissen wir doch E. L. gott lob des loblichen vorstandts, Das sie nit aüs pflicht, Sonder aus Christlicher bruderlicher liebe hinfurter nichs erwinden lassen vnd neben vns mit zeitlichem Rhat das ihenig vorbawen helffen, So vns allerseitz durch nachlassung vnd abziehung weiterer hilff zu vorweis vnd kleinerung langen mocht, Vnnd bitten demnach E. 1. als denn freundtlichen geliebten Sohne zum hochsten mutterlichen, Nachdem zu derselben nechst Got alle hoffnunge vnnd Zuuorsicht, E. L. wollen ietzig Jres bruders suchenn vnd gelegenheit reiflich ermessenn vnd vns Jres wolmeinlichen vnd rathsamen vorschlags, dem wir nit vorzugreiffen, sohnlich vorstendigenn, mit was vortraglichenn mitteln vnd wege Sr. L. zu helffenn, vnnd wes derhalbenn E. L. aus bruderlichem willen geneigt, damit beiderseitz gedienet, vnd derselben bruder zu heil vnd wolfart zur seelen vnd leib furstendig vnd dienstlich sein mag. Daran erzeiget E. l. sich als der Christliche pottentat, So Jren geliebten brudern, als der Eltter vnd hochuorstendige, zunehmmen vnd vffkhunfft aus schuldiger bruderlicher liebe vnd gunst vorthelffen soll vnd kan. Solichs wirt der allmechtige E. L. reichlich vorgeltenn, vnd
