144
90. 1562, 11 December? Vnser muterliche trew vnd was wir in ehren L[iebs] vnnd guts vermugenn zuuor. Durchleucht[iger] furst Freuntlicher geliebter Sohn. Wir haben E. L. schreibenn bey zeigern ein schatzung belangend empfangenn, vnd seines Jnhalts vernohmen, Vnd erach[tenn es] zum bestenn sein, Wan E. L. vns alhie sohnlich besuchet, das wir vns alsdann mit E. L. diser sachen hal[ben] freundtlich vnderredenn, Dahin wir es auch hiemit wol[lenn] vertzogenn vnd gebetenn haben, das wir vns vf dis mall nit anderst erklert, solichs Jm besten von vnns zuuermercken Vnnd befelhen damit E. L. gots schutz. Datum Coldingen denn 11ten(?) December Anno etc. Lx.... Dorothea Dorothea von Gotts gnaden Zu Dennemarcken, Norwegen, der Wenden vnd Gotten Konigin, Geborne zu Sachssen, Hertzogin zu Schleswig, Holstein etc., Witwe. Original paa Papir med Udskrift til Kongen og Segl (det danske og det saxiske Vaaben). 91. 1562, 19 December. Vnnsern freundtlichen grus vnd was wir in muterlichen trewen ehren liebs vnd guts vormugen stets zuuorn. Durchlauchtiger furst freundtlicher geliebter Sohnn. Wir habenn diser tagen abermals von vnserm sohn Magno etc. brieff empfangen vnd daraus vorstanden, Das Seine Liebden Jr Jungst Suchen bey Herloff Troll etc. zum theyl geendert, zu was meinung konnen wir nit aigentlich wissen. Wir vormercken aber aus seiner L. schreiben vngefarlich so vil, Das sie sich ohne E. L. vorgeende gewise erklerung schwarlich hieraus zubegeben vnd derhalben bedencken haben. Nun tragenn wir ob solicher vnbestendigkeit ein misgefallen, Jnmassen wir dan Sr. L. mitt geburlichem ernst als die Mutter eingebunden E. L. alls dem herrn bruder zugehorsamen, Vnd stellen demnach zu E. L. Wolmeinen vnd Rhat, Ob sie Jrem brudern obgemelt Mittel vorschlagen vnd namkundig machen Wollen, Wie vnnd vff was beschaidt sich Seine L. hieraus zuuorfugen, Dan was E. L. hierin vor Rathsam erachtenn, zweiffelnn wir nitt, Es zu derselben Brudern hertzog Magnussen etc. wolfartt vnd zu vnser allerseitz guttem gemeindt, Vnnd wirt vns E. L., das wir disen dingen wegen Weiblicher Einfallt nit zu Rahten, sohnlich entschuldiget nehmmen. Wann wir dan auch, Freundtlicher geliebter Sohnn, ein Mutterlichs vorlangenn tragenn vns einsmaln mitt E. L. freundtlich vnnd ergetzlich zubesprechenn, So geraichte vuns zu besondern freuden vnd danckparem gemuht, das wir E. L. als den freundtlichen geliebten Sohne mitt gottlicher vorleihung zu furderlicher Jrer gelegenheitt alhier sehen vnd erfahrenn mochten, Da es allein diser Windterlichenn ietzigen bösen zeitt halben E. L. an Jrer gesundheitt kein anstos zuuorursachen, Sunst wir
