146
Was wir in ehren Liebs vnd guts vormugen zuuorn. Hochgeborner furst, Freundtlicher geliebter bruder. Es hat vns vnser Maler Jost vnderthenigst ersucht bey E. L. Jne zuuorbitten, Das E. l. Jme gnediglichen wolten vorgonnen von derselbenn Freyen bawren vier Beum zum zimmer zuerkauffen. Ob wir nun wol E. L. in ietziger betewrung des holtzes vngern beschweren, So haben wir doch gemelts vnsers Malers so instendig vnderthenigst ersuchen angesehen, Vnnd ist derhalben an E. L. vnser freundtlich bitt, Die wollen diser vnser vorschrifft den vnsern geniesen lassen. Das vorschulden wir vmb E. L. hinwider in ehren freundtlich gern. Datum Coldingen den 16ten Januarij Ao 63. Paategning: Productum haderschleben den 17 Januari Ao 63. Konigin vorbit vor Jost maler Jhme etzlich holtz zuerkauffen zuuorstadten. Orig. paa Papir med Udskrift til Hertug Hans og Segl (det danske og det saxiske Vaaben). 94. 1563, 12 Marts. Vnsern muterlichen willen in trewen zuuor. Durchleuchtiger furst, freundtlicher geliebter Sohn. Wir haben bey disem botten schreiben von dem Churfursten zu Sachssen etc. bekommen, Daraus wir vorstanden mit was getrewem vleis es S. lieb vnd hertzog heinrich zw Braunschweig etc. meinen vnd begerrn zutreiben, Damitt E. L. geliebter bruder hertzog hans zu der Coadiutorej des Ertzstiffts bremen zugelangen. Dieweill vns nun hochermelter Churfurstt vnder anderm auch freundtlich zuerkhennen gibtt, was S. L. an E. L. bey gegenwertigem gelangen lassen vnd vns daneben gebettenn zu besserer vorttstellung dersachen E. L. mutterlich zuersuchenn, So woltens wir nitt vnderlassenn vnd bitten freundtlich, E. L. wollenn zu merer befurderung diser ding nochmals an doctor henckenn vnnd andere die furnembste Capitularn schreibenn vnnd also Jr derselbenn geliebtenn bruder lassen befolhen sein. Das wirtt der Allmechtige E. L. reichlich belegen vnd wir thun E. L. dem Allmechtigen empfelhen. Datum Coldingen den 12 Marcij Anno etc. 63. Dorothea von Gots gnaden zu Dennemarck Norwegen der Wenden vnd Gotten konigin, Geborn zw Sachssen etc., hertzogin zw Schleswig Holstein Stormarn vnd der Diettmarschen, Grauin zw Oldenburg vnd Dellmanhorstt. Widtwe. Orig. paa Papir med Udskrift til Kongen og Segl (det danske og det saxiske Vaaben).
