148
97. 1563, 4 Juni. Was wir in muterlichen trewen vnd ehren liebs vnd guts vormugen allezeit zuuorn. Durchleuchtiger furst, freuntlicher geliebter Sohnne. Nachdem sich E. L. in vorschiner Jrer gegenwart bey vns erstlich ettwas hart vorlautten lassen, vnsern Ambtman Jorgen Rosenkrantz zu vorgenomner Kriegsvbung wider den Schweden zugeprauchen, Vnd aber hernachmaln sich sonlich erbotten, auff derselben glucklichen widerankunfft aus Holstein, sich mit vns derhalben zu muterlicher ersettigung zuuorgleichen, So haben wir nit anderst muterlich vorhoffet, Dieweil vns E. L. vnuormeldet diser dinge vorbey gezogenn, Die solten jr neigung gegen gemeltem vnserm Diener gentzlich abgestelt vnd mit vns sohnlich geschertzt haben. Nun kommen wir aber ietzo in erfarung, Das E. L. gleichwol gemelten Rosenkrantz vorschriben vnd abgefordert. Da es dan also were, hetten wir vns dessen abgeneigten sohnlichen willens, (ohne alles vnser vorursachen) im geringsten nit befahret, Trugen auch E. L. halben, als des freundtlichen geliebten sohns, aus bewegnus der vorwandtnus, ein muterlich vnd hertzlich betrauren, Darumb das E. L., als die von Jugent auff in vnser eusersten muterlicher befurderung vnd vortsetzung Jres Koniglichen auffnemens gestanden, ietzo vns auch aus sohnlichem eingepflantzten willen, sonderlich in ietzigen geschwinden weltleufften behertzigen vnd mit trost vnd hilff in allem furstehenden als der getrewen Muter sohnlichen beystand leisten, vnd sich der gestalt vnser annemmen solten. Allermassen wir E. L. gedey vnd wolfart, wie E. L. selbst vnd jren furnembsten Rhaten guter massen bewust, muterlich gemeint vnnd gefurdertt. Da vns nun E. L. dagegen vnsern einichen diener enttziehen oder nit gonden solten, hetten wir vns dessenn aus angeborner liebe, als die E. L. vnder vnserm hertzen getragen, muterlich zubetruben, Vnd mussten vnser vnschulde vnd nit vorursachung E. L. halber hertzlich beweinen, Dieweil got der allmechtige sohnliche vnnd muterliche vorwandtnus gegen ausztrucklichem vorbott ye vnuorletzt haben will, Darzu wir vnsers theils vngern vorursachung geben wolten. Sonder zu aller zeitt E. L. als dem freundtlichen vilgeliebten sohne, nach allem vnserm eusersten erstrecken muterlichen willen vnd liebe ausfürlich zuerzeigen, sein wir freundtlich vnd begirlich geneigtt, Vnd wollen an E. 1. ebenmesiger sohnlicher erzeigung auch nit zweiffeln, vnd gewislich wissen, da sie sich aller eingepflantzter liebe vnd geneigter vnser muterlicher trew vornunfftiglich erinnern, Es werde E. L. sohnlich hertz durch gottliche gnad kein menschlicher Ratt von vns abwendig machen Konnen. Solten wir dan gedachts vnsers Dieners Hinfurter entrahten, So heten wir den trost dagegen Das E. L. daran ein fridfertigen getrewen haben, der Keines verrückten oder weiter gewissens oder vnrechtmesigen beyfalls ist. Vnd wollen vns E. L. Jr neigung hierin vnbeschwert ankhündigen, vnser Ambtsuorwaltung zu Drotingburg vff den Einen fall darnach wissen
