150
gnade vorleihen, dasz wir E. L. als den vielgeliebten sohne in aller frölicheit vnd liebe vns zu besondern freuden widerumb zu langen zeiten ergetzlich sehen mogen. Wir bitten aber gantz muterlich vnd freundtlich E. L. wollen sich nit vff Menschen stercke oder gewalt bestendiglich verlassen, Sondern alle Jre sachen in des aller hochsten hende stellenn, Der aller Menschen thun vnd wesen in seinen henden hat. Damit wir vns nun allezeitt des guthen zuerfröhen vnd des bosen, so der allmechtige vorhutte, mit E. L. zubeweinen, Als wolle vns E. L. mit jrem sohnlichen schreiben zuuilmalen besuchen Vnd vns also in sohnlicher getrewer gedechtnus halten. Das wollen wir vmb E. L. in muterlichen trewen vnd ehren freuntlich vorschulden. E. L. gottlicher beschirmunge empfelhende. Datum Flenszburg den 20 Julij Anno etc. Lxiij. Dorothea von Gots gnaden Konigin zw Dennemarck Norwegen etc. Geborn zu Sachssen etc. Hertzogin zu Schleswig Holstein etc. Widttwe. Dorothea. Orig. paa Papir med Dronningens Underskrift, Udskrift til Kongen og Segl (det danske og det saxiske Vaaben). 100. tenn. 1563, 23 Juli. Durchleuchtiger furst, Vnnser muterliche trew vnnd allesz liebs zuuorn. freundtlicher geliebter sohnn. Wir thun E. L. hiemit vnnserm freundtlichenn vorabschidenn nach derselbenn geliebtenn brudern hertzog Magnussen vberschickenn, Vnnd wollenn nitt zweiffeln, E. L. werdenn Se. L. bruderlichen zu beschaiden vnnd die Munsterung vnd abschaffung vnnotigs gesyndts halbenn zuuorfugen wissen. Ob wir nun wol gentzlich hoffenn, Se L. werdenn durch soliche Mittel vnnd wege verbessert werdenn, So were vnns doch nichs erfrolichers, Dann das Se L., nachdem derselben Stiffte Gott lob numer in ruosamen stande, Jr leben in christlicher ordenung eelig zubrech- Ohne allenn zweiffel, Es wurde durch gottes gnade in solichem stande das laster der trunckenheitt, auch ander vbel in Jrer L. ausgewurtzelt werdenn, Vnd dagegenn bessere vornunfft gebehrenn, Das also Se L. Jrem Stande vnnd lebenn nach dem willen des allmechtigen gehorsamlich vnnd gottseliglich nachkommen wurdenn. Dieweil nun E. L. von gottlicher hoheit zu einem Christlichen Potentatenn erhebt Vnnd Jren geliebten brudern an wurdin, weisheit vnd vorstande vorgesetzt, Als werdenn sich E. L. vornunfftlich wissenn zuberichtenn, was derselben aus bruderlicher schuldiger trew dagegenn zvthun gepüre, Vnnd wir wollenn mutterlicher zuuorsicht sein, E. L. werdenn Jr solich vnnser muterlichs bedenckenn der vorheyratung halbenn sonlich lassenn mit gefallenn, Vnnd in ansehung das sich derselben bruder Jres vatterlichenn erbthails vorziehenn, Jrer L. ietzo auch die bruderliche freundtschafft erzeigenn, Das sie Jre Stifft von E. L. vnnd Jrem Reich Lehenweisz empfahenn, vnd da sie durch Gottlichenn segen Mansleibs Erbenn bekhomenn dieselbige erbenn mogen. Vnd wol-
