154
hertzliche bekhummernis, Da E. L. begönnen sich vorziehenn, Vnd nit so furderlich, wie wol vorhoffet glucklich auszgefürt werdenn solt. Vnnd wirt vns gleich ietzo gelegenheit zugedenckenn, das wir E. L. ehrmals vnnserer mutterlichenn vorsorge wehmutiglich erinnert, Da sie vns sonlich vortrostet, Wie bald sie Jrer Kriegshandlung ein End zumachen gedechtenn. Es sihet vnns aber vnnser Weiblichenn einfalt nach ahn, als habe der Krieg allerhand beschwer, sorg vnnd vorhinderung vff sich, Vnnd kein masz leide, Vnnd desto zeitlicher vnd vornunfftiger zubedencken sein wolle. Wir hoffen vnd bitten aber zu gott dem allmechtigen, Das E. L. durch beschehne eroberung dem feindt zaghafftige forcht erwecket vnd numer bessern Einruck haben mugenn, Wie wir dann, eh vns E. 1. schreiben zukommen, vor aigentlich bericht worden, Das E. L. Jren ferrnern zuzug straxs ohne vmbschwaiff nach Schwedenn zu nemmenn, vnnd Jre Arme vnderthonen, So albereit zum hochsten abkhommen, mit weiterer vfflag vorschonenn Vnnd vielmer des feinds Leute beschweren wurden. Nachdem nun aber E. L. durch Jr konigreich zuziehenn vorursacht, wolten wir aus muterlichem getrewem gemuhte nit vnderlassenn, Vff solicher naheit E. L. mit diser vnser bottschafft muterlich zuersuchenn, Vff das wir, so vil Jmmer zugeschehenn, allezeit E. L. gesundheit vnd wolgehendt erforschenn mogen, Darnach wir ein hertzlichs vnd begirlichs vorlangen tragenn. Vnnd bitten derhalben gantz mutterlich vnnd freundtlich, E. L. wollenn vns Jren glucklichen zustandt hinwider zuschreibenn, Vnd sich danebenn vnserer trewhertzigen offtmals gethoner vormanung vnd bitte sonlich erjnnern vnd zu gemuht furenn, Jn wasz gelegenheit gefahr vnd sorg E. L. vnd wir alle sitzenn. Dan es erscheinet, Nachdem ewer liebden so tieff in die sachenn gerahtenn, Das vnmöglich sich durch Menschliche vornufft, witz oder Krafft daraus zuwirckenn, Vnnd derhalbenn hochlich von noten sein will, hilff zusuchenn bey dem, bey wolichem nichs vnmöglich ist. Vnnd wie Dauid vnd andere Konig auch E. L. geliebter herr vnd vatter hochchristseliger gedechtnus, da sie miten in der noht vnd in der feinde gewaldt gewesen, zu Gott dem allmechtigen in starckem vortrawenn geflohenn vnd errettet wordenn, Also wolle E. L. sich solichen christlichen Exempeln nach als der Kriistliche Potentat auch gemes erzeigenn, Vnd zu Got dem allmechtigen neben vns ruoffenn vnd seuftzenn, Das Seine Gottliche allmechtigkeit E. L., derselben Konigreich, Land vnd Leute vor allem vbel vnd vngluck gnedigst wolle erhaltenn vnd in gegenwertiger schwaren gelegenheit mit weiszheit vnd Rhat gnedigst zustatten kommen. Vnnd wir bitten E. L. muterlich vnd zum vleisigsten, die wollen sich von vbermesigen trincken, daraus all andere erschröckliche sunden herfliessenn, enthalten, Vnnd Jrenn geliebten bruder herzog Magnussenn in bruderlichem beuelch halten, Vnd warmit E. L. Seiner L. an weisheit, Rhat vnd zur wolfart nutzlich sein konnen, Als wolle E. L. seine L. in schuldiger bruderlicher vormanung vnd liebe halten. Daran erweiset sich E. L. christlich vnd bruderlich, Vnnd wir haben auch an E. L. erzeigung
