157
allmechtig durch dise Leut die obrigkeit ernert vnd erhelt, Bittenn wir freundtlich E. L. wollen hierin nachdenckens vnd forschens haben vnd die gleicheit beschaffen lassen, auch es in allweg nit anderst dan wirs empfangen von vns sohnlich vfnemmen vnd dasz es muterlicher getrewer meinung von vns gemeindt. Das vorschulden wir vmb E. L. in allen muterlichen trewen. Datum vt in literis. Dorothea. Paategning: Productum Fridrichsburg den 19 8bris Anno etc. 63. 104. 1563, 4 December. Vnsern freuntlichen grus vnd was wir in muterlichen trewen ehr liebs vnd guts vormugen zuuor. Durchleuchtiger Furst, freuntlicher geliebter son. Was vor muterliche bekummernus angst vnd sorge vns E. L. Kriegs zustande Erstlich Irer person halben erwecket vnd darnach wegen der armen vnderthonen, die zu vnwiderbringlichem schaden vortriben, erschepft vnd vorhert werden, das hat E. L. zu vilmalen muntlich vnd schriftlich von vns vornommen, Vnd haben vns daruff zu E. L. als dem geliebten sohne der eingepflantzten vorwantnus nach sonder zweiffel getrost, Sie werde vns mit merer betrubnus verschonen. So befinden wir aber daruber vilmer beschwer vnd beweinen, darein wir vber all vnser vortrawen geführt werden, Jn dem wir E. L. brudern Hertzog Magnussen jn vnserm zuruck zug des Landes zu Luneburg jm Closter Pretz, alda S. L. in die kinder bocken gefallen, vor vns gefunden, vnd ob wir woll sein lieb nit gesehen oder selbst zured gesetzt, So haben wir doch S. L. angezeigten ellenden vnnd vorlassnen zustande zugemuht genommen. Vnd ist seiner L. vnd den Iren wie wir vormercken nit allein mith einicher zerung oder erstattung des schwedischen zugs nit gedacht, Sonder auch mit besonderm vngnedigen willenn zum hefftigsten eingeknipft vnd betrawet worden ohne vorziehent dise Reich zuflihen. Wolichs dan zumall schmertzlich vnd vns so wehmutiglich zugemuht geht, das wir es E. L. nit allerding schreiben dorffen. Vnd wan wir daneben bedencken, wolicher massen S. L. erstlich von E. L. aus Liffland gefordert, Auch in Schweden gefuhrt vnd jn den absag brieff gesetzt, dardurch dan S. L. zw allerley thatlicher findschafft vnd Miszuortrawen bey dem Schweden gefallen sein soll, Konnen wir in vnserm muterlichen hertzen nit Finden, da gleich S. L. wider E. L. ettwas groblich vorbrochen, Jnmassen wir dan wissen das S. L. aus Jugentlichen vorstande ermals sich vorsehen, Wie sich ein so hilflose erbitterung vnd abfertigung reimen mocht, dan ye Seine L. E. L. naturlicher bruder vnd von E. L. dergestalt vorfordert worden, das es zu derselben person, Jrer armen Stifften vnd vnderthonen wolfart vnd trost zugedeyhen. Ob es nun durch dise ietzige Mittel vnd weg zugeschehen Konnen wir nit finden, Vnd were ja zuerbarmen da es dahin gemeint sein solt, wie es wol scheinet, da man sich keines gefarlichen abfals mer zuuormutten, vrsach zusuchenn, damit wir zuletzst die Burdin vnd beschwer tragen solten, dan E. L. weist sich zuerinnern was wir derselben in erster Jres bruders abfertigung nach liffland vnd sunst alle 20*
