159
solte sich E. L. in bey sein viler vom Adel haben vorlauten lassen, das wir in arbeitung vnd embsiger furderung stunden zu solicitiern, damit E. L. junger bruder hertzog hans zu holstein zw Einem Konig erweltt werden solt. Wir haben aber soliche anzeig vor nichtiglich jn wind geschlagen vnd vilmer daruff gesehen, das E. L., als die vnser muterlich hertz in jren henden, dem da es gleich vf vns gesagt, aus sohnlichem vnd koniglichem vorstand kein glauben zumessen wurden. Nun haben sich aber jm Land zu Luneburg vnd holstein Etliche E. L. Abgedanckte Statliche Kriegs leut, Ritmeister vnd ander glaubwurdige vff obgemelte meinung auch horen lassen, demnach wir aus bewegnus vnser hochsten vnschult dise ding nit mehr vorbeissen, Sonder vnser wehmutt des fals gegen E. L. ausschutten mussen. Vnd sagen das der ihenige was stands der sey, der vns dergestalt bezichtigett, vff vns falschlich vnd Ehrendibisch gedichtett vnd gelogen vnd mit keinem grunt nimmermer vf vns bringen mag, Wollen es auch bey dem, der vns vnd E. L. geschaffen, beteuren, das wirs nie in vnsere gedancken gefast, vil weniger das wirs gesagt haben solten. Vnd haben derhalben gar kein zweiffell, der allmechtige Gott werde den ihenen, der also vnuorschembt wider gott vnd ehr vns mit vn warheit eingetragen, zu seiner zeit straffen vnd des Teuffels saumen, den er hierin gern aussehen wolt, steuren vnd wehren. Es thut vns aber E. L. person halben hertzlich wehe, das sie ein so boses vortrawen in vns setzen vnd sich nit erinnern sollen, wie recht treulich vnd wol wir es mit E. L. gemeindtt vnd noch meinen vnd das wir dieselbige vor den andernn vnsern Koniglichen Kinder hochstes vormugens mit vnablesigem anligen zu jrem vffnemen vnd gedeyen vortgesetzt, Inmassen wir dan solichs E. L. eigen Christlichem gewissen vnd all derselben Reichs Retten zw vrtheilen heymstellen, Vnd ist gott vnser zeug das vns ietziger Krieg aus muterlicher recht trewer liebe vnd sorgfeltigkeitt allerley bekommernus vnd hertzenleid allein E. L. person vnd dan diser Reich vnd vnderthonen halben vfgewirckt, vnd was wir an E. L. derhalben geschriben, von vns aus keinem geferbten Schein Sonder Christlich vnd wie wirs vor gott dem allmechtigen an ihenem tag bekennen wollen, gemeindt ist. Derhalben E. L. vns des gedachten argwons, da sie vns denselben vfgefeylt erlassen vnd an vnserm muterlichen hertzen hinfurter nit zweiffeln wollen, darumb wir zum vleisigsten bitten, vnd sol es E. L. gewislich dauor halten wa wir derselben mit ietzigem vnserm Armen vormugen alle muterliche ehr vnd wolthaten wissen zuerzeigen, das es wie zuuor allwegen jm werck soll eruolgen, das wir E. L. nit mochten vorhalten, die wir gottlicher beschirmung empfelhen, Vnd bitten vns jren glucklichen zustande hiemit zuuormelden. Datum Coldingen den 4 Decemb. Anno etc. 63. Dorothea von Gots gnaden zu Dennemarcken Norwegen etc. Konigin, Geborn zw Sachssen etc. hertzogin zu Schleswig Holstein etc. wittwe. Dorothea. Orig. paa Papir med Segl (det danske og det saxiske Vaaben) og Udskrift til Kongen „zu aigen handen".
