160
Paa en lös Seddel. Auch freuntlicher geliebter sohn, Mogen wir nit vnderlassen hiemit nochmals bey E. L. Jres Kriegs wesens halben zugedencken, Vnd wie wir ieder zeitt den Edlen friden hertzlich gern gefurdert gesehen, Also ist vf dise Stund vnser vorlangen vnd' dursten dahin gerichtt, Vnd wollen E. L. wie zuuor alzeit darzu abermals aus muterlichem getrewen wolmeinen erinnert vnd daneben gebetten haben E. L. wollen vns, wa zu geschehen, Jr fridliche sohnliche meinung vortraulich zuschreiben, Als wollen wir nach vnser weiblichen Einfalt mit gots hilff nichs lassen entsein was zu fridlichem handel jmmer dienstlich sein mag. Vnd demnach wir ein muterlich vorlangen derhalben vnd sunst der vorwantnus nach vns mit E. L. freintlich zu vnderreden, Als were vns Lieb, da E. L. vf diser naheit, das sie sich sohnlich ohnbeschweren mocht vns alhier freuntlich zubesuchen, Darumb wir muterlich bitten. Da es aber vber Ewer L. gelegenheit, wolten wir vns gern zu E. L. bis gehn Nyburg entheben vnd begeren dessen auch von E. L. freunttlich Antwort. Datum vt in Literis. Dorothea. 105. 1563, 26 December. Vnser freuntlich grüs, mit wunschung ewiger vnnd Zeitlicher wolfart zuuor. Durchleuchtiger furst, freuntlicher viellieber sohn. Wir haben E. L. widerantwortt, so sie vns bey vnserm Jungen vf vnser schreiben wiederfahren lassen, empfangen vnnd vornommen, Vnd seihen hochlich erfrewet, das wir E. L. ankunfft alhier bey vns muterlich gewertig sein mogen, Dan E. L. sollen vnd wollen vns sohnlich glauben, das wir in besondern begirden vnd vorlangen stehn, der muterlichen Zuneigung vnnd trew nach, einsmal mit E. L. ergetzliche besprachung zuhabenn, Vnd damit wir vns dero desto gewiser zumachen, vnd nit besorgen dorffen das etwan E. L. Jre gelegenheit in disem angefallnen frost endern mocht, Sonderlich weil wir dieselbige mertheyls nach dem land zuholstein zureisen gericht befunden, So haben wir demnach gedacht, E. L. mit disem vnserm schreiben muterlich zubelangen, Mit freuntlicher bit, E. L. wollen es im besten vormercken, vnd vns als die getrewe Mutter Jrem ersten sohnlichen zuschreiben vnd erpieten nach, ohnuorbeyzugig gewehren. Solte nun aber E. L. vber all vnser zuuorsicht, einiche abhaltung vorgestossen, oder zu syn gebracht worden sein, Als wollen wir nit vnderlassen, vns an E. L. so es derselbigen Jmmer gefellig zu freuntlicher erliebung muterlich zuentheben, Vnd damit des Teuffels saumen, den er seiner Ohnart nach, gemeinlich durch Mittels personen vnd bose leutt vnder so nahen vorwandten auszusehen pfleget, durch gotts gnad, zu steuren. Wir haben aber vilmer an E. L. sohnlicher willfarigkeit vnnd hieherkommens ein gantz zuuorlessig vorhoffen, wolten wir E. L. freuntlich nit bergen, Dero wir wie zuuor allwegen mit muterlicher recht
