164
vnser lieber besonder Dittrich Vxkull den vnfall wehmutiglich zuerkennen geben, darein er vnd andere Stiffts Stende in der wieck gantz klaglich vom Schweden gefuhrt, Mit vnderthenigster Bitte Jme mitt gnaden zuerscheinen, Jnmassen E. L. aus Jngelegter seiner Supplication gnedigst zuersehenn. Wan wir nun solich Clagen vnd Ellenden zustannde zu gnedigstem mittleiden vorstanden vnd vor christlich vnd recht billich erachten, den guten Leuten, so vil Jmmer zugeschehen, allergnedigst zu helffenn vnd in disem vnmesslichen erlittnen Jhamer zustatten zukhommen, Wolten wir gedachtem Vxkull aus gnedigster christlicher neigung auch nit entseyn. Vnd ob wir woll weniger dan nicht zweiffeln, E. L. werde ohne das der vorwantnus nach mitt all den vortribnen Stiffts Stenden vnd vndersassen ein gnedigst mitleidlich beklagen haben vnd sie ohne vnser vorschreiben zu Jrer befugung zu befurdern mer dan geneigtt sein, Bitten wir doch als die Mutter E. L. zum vleisigsten vnd freuntlich, E. L. wollen hierin nach Jrem Koniglichen vorstande die mittell wircken vnd vnderbiegen, damit erstlich dem allmechtigen zw ehrn, E. L. freuntlichen lieben brudern hertzog Magnussen etc. auch derselben Land vnd Leuten zw gedey vnnd wolstande der Arme vorlassene Adell Jn wick, so vom Schweden gewaltiglich weggerissen, nach gelegenheitt von E. L. hilff erzeigett vnd Jrer getrewen dienst vnd redlicheitt geniesen mogen. Jnsonderheitt Bitten wir auch E. L. gantz muterlich, E. L. geruhenn angemeltem Ditrich Vxkull in gnedigster ergetzlicheitt zuhalten vnd Jne seiner angewandtenn Adelichen trew vnd vnderthenigsten dienst, die er gegen E. L. vnd den Jren nit weniger kunfftiglich zuerzeigen jn vnderthenigster beger, allergnedigst empfendenn lassen, wie wir dan neben Jme zu E. L. ein besonder muterlich vnd vnderthenigst vortrawen setzen, vnd was vns dan E. L. hierin vff vnser bittlich ersuchen zu ehren, den andern aber zu freuntlichem vnd gnedigstem gefallen erzaigen, das begerrn wir in muterlichen trewen, als were es vnsz selbst widerfahren, zu halten, Vnd es wirt von Jnen vmb E. L. vnderthenigst zuuorschulden ohne zweiffell in dienstparlicher angedechtnus gehalten. Warmit wir E. L. dem allmechtigen empfelhenn. Datum Coldingen den 17 Marcj Anno etc. 64. Dorothea von Gots gnaden zw Dennemarck Norwegen etc. Konigin, Geborn zw Sachssen, hertzogin zw Schleswig Holstein etc., Witwe. Dorothea. Original paa Papir med Udskrift til Kongen og Segl (det danske og det saxiske Vaaben). Bilag til Nr. 110. Durchleuchtigste hochgeborne Koniginne gnedigste Fraw. Ewer Ko. wirden seint meine vnterthenigste gehorsame dienste mit hochstem vleis stets beuorn. Gnedigste Konigin, E. ko. w. werden one zweiuell hiebeuorn, welcher gestalt das Schwedisch Krigsvolck Jn Lieflandt die Wieck (E. ko. wirden etc. hern Sons der Ko. Mt.
