166
will, Ewer ko. Mt. solchs reichlich widderumb zu belonen. Ich erkenne michs auch nach all meinem vormuegen zuuordienen schuldig. E. Ko. Wirden vnterthenigster Ditterich Vxkull zu Fickell Erbgesessen etc. 111. 1564, 2 April. Durchleuchtiger Furst, freuntlicher liebster sohn, E. L. sey vnser liebe vnd trew allezeit zuuor. Vnnd bitten daneben muterlich, E. L. wollen ob diser vnser abermaliger botschafft nit vordrieslich sein, vnd es sohnlich dahin halten, dasz wir aus eingepflantzter muterlicher zuneigung sonderlichen in gegenwertiger kriegs gelegenheitt, die vns E. L. als des liebstenn sohns halben mancherley schmertzen, sorg vnd bekummernus erweckt, ye gern E. L. zustande erfahren mochten, vns des guten zuerfrewen, vnfals aber, so der liebe gott lang vorhute, zubeweinen. Vnd geben E. L. hiemit freuntlich zuwissen, das vns derselben sohnlich widerschreiben zuhanden Kommen, vnd ist vns gantz erfrolich, das der Schwedt vonn Bahus gewichen, Wollen dardurch zu Gott dem allmechtigen hoffen, dasz seine gotliche allmacht vnser einfeltig vnd christlich schreiben bey Jm hab etwas wurcken lassen. Derselb liebe gott wolle beeder E. L. vnd des schweden gegen einander feintlich tragent gemuht dahin richten, dasz sie numer von Tatlicher handlung abstehn, vnd durch gotts gnad frid vnnd ruhe suchen mogen. Vnd ob wol zusehen nichs schadet vnd wir E. L. sorgfeltigkeitt vnd vleis, so sie in starcker ausmachung der Schiff gebrauchenn, loben, So ist doch das groste, so vns bekummertt vnd vff dem nacken ligt, Nehmlich vnser miszuortrawen in die kriegsleutt, dero beginnen vnsers besorgens zum theil vilmer zw eignem nutz vnnd vorderben Land vnd Leut dan zw Enigkeitt geneigt, vnd ist derhalben leichtlich zuglauben, dasz bey solichen leuten in glucklichem vorfall an böser vorhetzung gar nichs erwenden werde. Weill aber gott allmechtig vnd der gantzen welt macht in seinen henden hatt, Wir vns auch zw E. L. muterlich vorhoffen, Sie werde numer hinder sich sehen vnd wissen, was kriegen vnd frid sey, Schepffen wir vns widerumb trost, vnd haben aus eingepflantzter muterlicher zuneigung ein hertzlich vorlangen, das wir E. L. den liebsten sohne Jn ietziger gelegenheitt muterlich sprechen vnd einsmal widerumb sehen mochten, Theten auch E. L. darumb zum vleisigsten hieher fordern vnd bitten, do wir nit besorgten, das E. L. Jres kriegs halben abgehalten. Da wir nun aber bey E. L. anmutig vnd mit vnser person zu ewiger vnd zeitlicher wolfartt erscheinen konten, Solte vns, ohne gottes gewalt, Kein vorhinderung der weite zu schwer werden. Weil aber dagegen E. L. Jre Statliche kriegs vnd andere rehtt bey sich hatt, die
