172
gentzliche Einkunfft vnd Regierung derselben Thumbcapittell Stiftsvogten vnd Rethenn vnuorhinderlich zugebrauchen haben. Derhalben wir vns dan desto mer muterlichen. trost fassen, E. L. werde nit allein ob solichem vnfug ein besonder miszgefallen tragen, sondern dise beschwer neben schmelerung der Regenten auch Capittel vnd Rethen nit weniger furderlichen abwenden, Vnd darnach die Jre dahin weisen, das sie allein vmb ansehens vnd wircklicher vortsetzung halben des Schutzs doch ohne beschwer vnd vorderb der Armen Stifft trachten, Die vberige bestellung aber der Regierung vnd gentzliche Einkunfft hertzog Magnussen lieb als desselben erkaufft gutt volgig sein lassen, Allermassen wir E. L. darumb herzlich bitten vnd ersuchen, die wolle vilmer gotts des allmechtigen vnausbleiblich streng gericht vnd rechtfertigung, auch gemeine wolfart, guten nahmen vnd glimpff dan das priuatt vorsetzen, Vnd daneben behertzigenn, zu was entlichem vorderb jr bruder, derselben Arme Stifft vnd vnderthonen vnuorwurckt gerahten, Vnd also vbereylens vnd vnuorsehens mit in die suppen gebrockett wordenn. Darumb dan E. L. aus schuldiger trew vnd vffgenommenn Koniglichen schutz durch gotts gnad die mittell, vnd wegk zum furderlichstenn wolle vorhandlen, das jr bruder bey disem noch habenden Armen stifft vor thatlicher feindtlicher vberziehung pleibenn Vnnd jr wolfartt mit widerbringung der Eingenomnen wieck durch E. L. rettung vnd beystand erweitertt werde. Daran erzeit E. L. das ihenig, so sie vor gott vnd der welt schuldig, Aber in vorlassung nimmer mer vorantworten konnen. E. L. bitten wir abermals zum hochsten, die wolle dise Arme berurte landt neben jrem freuntlichen liebenn brudern in freuntlichen gnedigsten beuelch halten, vnd jr hilfflich gemutt, des die Arme betruckte vndersassen mit hochster begir gewertig, Auch begerte abstellung schrifftlich vnd beuelchs weis gegen den jren bey diser vnser bottschafft eroffnen, Vnd damit auch vnser burdin vnd vnderhaltung, die vns Seiner L. halben von E. L. vffgewurcktt, sohnlich vnd Christlich behertzigen. Das wirt E. L. zu besonderm sohnlichen gehorsam gerechnett, die wir zu allem gluckseligen stand vnd sighafftigenn regierung der krafft gotts empfelhen. Datum Coldingen den 1ten Maij Anno etc. 64. Dorothea von Gots gnaden zw Dennemarcken, Norwegen etc. Konigin, Gebarn zw Sachssen etc., Hertzogin zw Schleswig, Holstein etc., witwe. Dorothea. Paategning: „ankomen zu Coppenhagen den 4 Maij Aº. etc. 64." Orig. paa Papir med Udskrift til Kongen og Segl (det danske og det saxiske Vaaben). Bilag til Nr. 117. 1564, 1 Maj. Dorothea von Gots gnaden zw Dennemarck Norwegen der Wenden vnd Gotten Konigin, Geborn zw Sachssen etc., Hertzogin zw Schleswig Holstein etc., Witwe.
