173
Vnsern gnedigsten willen zuuorn, Hochgelerter besonder lieber, Nachdem Jr euch Jn vnsers freuntlichen lieben sohns hertzog Magnussen hendell alle zeitt ausrichtig, Daruor wir euch nochmals danckpar, greifflich erzeigett, So haben wir zu euch vnserm . besondern lieben ein gnedigste zuuorsicht, Jr werdett hinfurder nichs erwinden lassen, So seiner L. derselben Armen Stifft vnd vnderthonen Jmmer furstendig vnd furdersam. Wie gefarlich vnd Ellendtlich nun gegenwertiger zeitt die lifflendische hendell stehn Jst vor augen, vnd geben es die beschwerliche exempell der wieckischen feintlicher eroberung vnnd verner vormutlichen Oselischen vberzugs klar zuerkennen. Vnd beklagen sich gemeine gemelter der Stifft Ozell vnd Wieck Stifft Stende gegen hochermeltem vnserm sohn mit anruffung hilff trost vnd errettung so erbarmlich, das wir darumb, Auch das der Ko. W. Regenten Jres beuels miszbrauchen vnd von Jnen der zerung halben gefarlich gehandlett werden soll, nit vnderlassen konnen hiemit vnsern freuntlichen geliebtenn sohn Konig Friderichen muterlich zuersuchen, Angesehenn, da gleich Jrer L. geliebter Bruder hertzog Magnussen die ding wolten zu gemuht fuhren, mochte es doch wenig oder gar nichs geachtett werden, wie sich dan die Ko. W. selbst gegen vns vornemmen lassen, das sie Jres Bruders schreiben niemals gelesen. Vnd gewindt eben Jetzo die Konig. W. gelegenheitt mit vns zu schertzen, Jn dem Jre L. niemals jn Christoff walckendorff recht gnedigst vortrawen gesetzt, Er aber vor vns dermassen gerohmbt worden, das wir vns keines argen vormutett. Nun geschichtt vns recht, Vnd wirt nicht vorgeblich gesagtt: wer nit vortraut der wirtt nit betrogenn. Solichs schreiben wir euch darumb, damit wan vnser freuntlicher geliebter sohn der gelegenheitt gedechtt, das Jr Jrer L. anzuzeigen, wir vns hierin selbst noch wol wusten zuerinnern. Gedachter Walckendorff soll vnder anderer vngebur die Arme Stifft dermassen aussaugen, das er, wie glaublich einkhombt, so wol das geringst als hochste zu seiner leibs noturfft von S. hertzog Magnussen L. Stiffts Einkunfft bezalen vnd straxs sein eigen nutz vnsers. Sohns wolfartt vorsetzen soll vnd sich sunst in gebieten vnd vorbieten dermassen erheben, als were vnser Sohn oder Jre Aidsvorwante gantz frembde, wolichs nun zumal erbarmlich vnd Seiner L. nit vnbillich darob Jr hertz erkalten mocht, Wan sie hinderdechten, jn was gefahr vnd Ellentt sie sich in vorzeihung Jrer vatterlichen Erbschafft gesetzt. Wir aber beuelhenn es den jhenigen vor dem jungsten gericht zuuorantworten, die vns soliche gepflogne handlung als vor nutz vnd rathsam eingebildett, vnd ist gott vnser zeug, das wirs aus keinem vorsatz, sondern wie vnserm sohn dem Konig bewust, bewilligt haben. Wan nun die sachen jn dem erbarmlichen standt vnd wesen, wie jr vngefarlich aus vnserm schreiben ietzo an die Ko. W. ergangen zuersehen, So gesinnen wir an euch vnsern lieben besondern mit besonderm vleis, Jr wollett euch vnsern Armen Sohn Magnussen sambt derselben Stifft vnd vnderthonen Jm besten lassen beuolhen vnd angelegenn sein vnd bey der Ko. W. die furderung, christliche erin- 22*
