177
das freuntlich vnd gewiszes vortrawen, E. L. werde vns darob vnsohnlich nit vordencken, dieweil es allein zu Jres bruders ewiger wolfart gemeint, Vnd wir daneben wissen, das daran dem allmechtigen got ein dienst geschichtt.. Vnd stellen demnach E. L. hiemit gantz freuntlich anheim vornunfftiglich zubedencken, was vor rohm, koniglicher nam vnd lob E. L. bey allen vornunfftigen werde erwachssen, da man E. L. furderung vnd willen zu solichem christlichen stande vnd werck spürett, dagegen aber was vor allerhand nachrede sich zubefahren, da hertzog Magnusz widerumb Jn lifflandt ohne geregiert ziehen, darinnen in trunckenheit vnd ander vnfurstlich lebenn, die sie gott lob alhier durch vnser geburlich einsagen vorlassenn, gerathen vnd also E. L. vnd all derselben vorwantenn zu spott Jr leben vnehlich zubringen solte. So mogen wir E. L. muterlich nit bergen, das vns das fraulin zu pommern zu gedachter heuratt von ettlichen fromen leuten vorgeschlagenn vnd sonderlich berumbt worden, das sie an getrewem ehlichen Einsagen gegen Seiner hertzog Magnussen lieb nichs erwinden lassen wurde, dardurch besserung vnd alle gottes forcht zuuorhoffenn. Mochten wir nun hieruff E. L. als des Christlichen potentaten, der den andern Jren bruder An vormugenn alter vnd weisheit vorgehet, geneigten willenn vnd rath zu disem Christlichen werck vorstehnn, So konte man alsdan den sachen ferrer nachdencken, wie die anzutreiben vnd in geheim zu vnderbawen. Bitten darumb auch gantz muterlich vnd vleisigk, E. L. wolle Jr dis vnser muterlich ansuchenn nicht allein lassen christlich wolgefallen, Sondern vns darin Jren freuntlichen vortrauten willen bey disem vnserm Jungen zuerkennen geben vnd die vnfreuntliche neigung, so sie zu Jrem bruder gefast vnd S. L. gegen E. L. vileicht vorwirckt haben mocht, ablegen vnd sie also in gnedigem freuntlichen beuelch halten. Das erfahren wir als die Mutter zu sohochem erfrewen, Als vns vff diser welt erzeigt werden kan. So werden es E. L. gewislich befinden, das S. L. sich durch gots gnad in solichem Stande bessern vnd nach E. L. geheys vnd willen vorhalten werden, Vnd wirt es der allmechtig gott E. L. fur allen dingen reichlich belohnen, die wir zu gotts gnad vnd Schutz recht treulich empfelhen vnd derselben hinwider muterlich zuwillfaren willig sein. Datum Coldingen den 24 Junij Anno etc. 64. Dorothea von Gots gnaden zu Dennemarck Norwegen der Wenden vnd Gotten Konigin, Geborn zu Sachssen etc., Hertzogin zu Schleswig Holstein Stormarn vnd der Ditmarschen, Graffin zu Oldenburg vnd Dellmanhorst, Wittwe. Dorothea. Original paa Papir med Udskrift til Kongen og Segl (det danske og det saxiske Vaaben).
