178
122. 1564, 8 Juli. Vnsern freuntlichen grus, vnd was wir in ehren liebs vnd guts vormugen zuuor. Durchleuchtiger Furst freuntlicher geliebter Sohn. Wir mugen E. L. muterlich nit pergen, dasz vns vnser liebe besondere Metta wib, Jacob wibs eliche hausfraw zu Ripen vnderthenigst zuerkennen geben, das vor Konig Friderichs zeit Ein bischoff zu Ripen petter genandt Jrem Man ein stuck Erden aus gnaden eingegeben, wolich Erden er hernachmals mit ser groser bekostigung gepawet, gepflantzet vnd also zu einer wischen gemacht, woliche wischen Jme hernach von konig zu konig zeit sein vnd seiner hausfrawen leben zu nutzen vorschriben worden. Nu komme sie jn erfarung, dasz Niels Lang einer andern frawen zum besten dieselbige bey E. L. ausbitten wolle, derhalben sie die Supplicantin vnderthenigst vns hiemit vmb vorschrifft an E. L. anlauffen mussen, Sonderlich auch darumb, weill E. L. jr hiezuuor alhier gnedigst zugesagt, Sie solle [nach] absterben Jres Mans die wischen zeit jres lebens ha[ben]. Wan nun die sachen also gelegen, vnd vnsers erachtens dem Armen weib die wischen wol zugonnen, So ist darumb an E. L. vnser gantz freuntlich bitt, E. L. [wolle] soliche wischen zu Ripen, Biszben genant, der Armen frawen nach Jres Mans thod gnediglichen vnd wie s[ie] sagt, gethoner zusage nach, vorstatten vnd nit vorgonnen, dieselbige Niels Lange einer andern ausbitten moge, Angesehen dasz der Man Jacob wib mercklichen grose[n] schaden gelitten, vnd vor ettlichen Jharen von Reutern vnd kriegs knechten, die jm zu haus geleget worden, zum hochsten betrogen worden, derhalben Jme dan vilgemelte wischen dagegen vorschriben worden. E. L. wollen dise vnsere suchung nit vnfreuntlich vorsten, vnd die arme fraw Metta wib hierin der wischen halb in gnedigsten beuelch halten. Das wollen wir vmb E. L. muterlich vorschulden, vnd die fraw wirt es zeit Jrer leben vnderthenigst mit Jrem gebett vordienenn. Gott befolhen. Datum Coldingen den 8 Julij Anno etc. 64. Dorothea von Gots gnaden Konigin zu Dennemarck, Norwegen etc., Geborn zu Sachssen, hertzogin zu Schleswig, holstein etc., Witwe. Dorothea. Original paa Papir med Udskrift til Kongen og Segl (det danske og det saxiske Vaaben). 123. 1564, 29 Juli. Was wir in muterlichen trewen ehr, liebs vnd guts vormugen zuuorn. Durchleuchtiger Furst, freuntlicher geliebter sohn. Nachdem es E. L. vnsers behalts vor rahtsam angesehen, das derselben bruder hertzog Magnusz sich widerumb nach Jren Stifften vorfugen sol, So haben wir S. L. ietzo mit zerung vnd anderer noturfft schir vber
