179
vnser muterlich vormugen abgefertiget, Damit S. L. hierin ye keines vngehorsams halben anzuzihen, dan allermassen wir vnser muterlich hertz zu pflantzung vnnd erhaltung all vnser hertzlieben kinder bestendigen bruderlichen vnd freuntlichen willens hie zuuor gegen E. L. vberflussig ausgeschuttet, Also wolten wir vns ietzunder auch erzeigen, vff das E. L. zu widerigem vnbruderlichen willen im wenigsten nit vorursacht werden mocht. Wir sein auch vorhabens S. L. in derselben reis bis durchs Land zuholstein zubringen, Vnd mogen E. L. daneben muterlich nit vnangezeigt lassen, So balt vns E. L. schreiben vnd bedencken in der bewusten Pomerschen sachen zukommen, ohnangesehen das E. L. darzu wenig hoffnung geben, hat der allmechtige die gelegenheit geschickt, das wir von stund an vffs formlichst, wie wir vnser einfalt nach Jmmer erachten konnen, den hertzogen zu Pommern beschickt, wie E. L. aus Jnligender Copey vns widergegebner erklerung finden wirt, Waraus dan zusehen, wie vns auch muntlich eingebracht wordenn, das die furnembste Stim vnd bewilligung an E. L. gelegen, Vnd schwarlich ist ohne derselben freuntliche erklerung in der sachen was fruchtbarlichs zuwurckenn. Dieweil nun freuntlicher geliebter sohne solich werck allein zur seligkeitt, nimandt damit schaden zuthuen gemeint, Vnd sunst kein raht ist, dardurch E. L. bruder mochte gebessert werden, So bitten wir gantz muterlich vnd hertzlich, E. L. wollen soliche sach fur sich gehen lassen, dieselbige nit sperren oder zu vnfrucht vorschieben, Sondern sich gegen vns als der geliebte sohn hiemit derogestalt ohne vmbschweiff freuntlich erkleren, damit jm fahl vorfallender ding wir allein E. L. freuntliche neigung ietzo vff Jhener seit weisen konnen. Jnmassen wir vns zw E. L. gantz bestendiglich vorhoffen, die werde zu gottes des allmechtigen greulichen zorn, den E. L. hierin vff sich laden mocht, nit vrsach geben noch sich von bosen Eingebern zu argem nachdencken bewegen lassen, Dan gottes gedancken ye hocher sein dan vnsere. Vnd mochte zwar am letzsten stundlein nit auspleibenn vnd E. L. ein weit gewissen machen, da sie in dieser sach das ihenig hindern oder vorseumen solten, So Got von E. L. ernstlich fordert vnd aus bruderlicher schuldiger liebe gethon haben will, Vnd sein derhalben nochmals der gewisen hoffnung, E. L. werde sich hierin dermassen erzeigen, das es derselben bey got vnd der welt Rohmlich vnd Jrem bruder nutzlich sein moge, So wollen wir gott den allmechtigen mitler weil bitten, E. L. hertz, wolichs er in seinen henden hat, also zuregiern, damit sein gotlicher nahm in E. L. allein geheylget, Vnd nit durch Teuffels list gehindert werde, So sein wirs gewisz, das wir an E. L. alsdan auch ein hertzlieben gehorsamen sohn haben vnd mit fernerm argwenigem schreiben von E. L. sohnlich vorschonet werden. Dan wie solten wir E. L. vngluck vnd vnheil gern sehen oder wunschen, So doch E. L. vnder vnserm hertzen gelegen, Vnd es die naturliche zuneigung, liebe vnd natur der eltern gegen Jre Kinder Jm werck vil anderst ausweiset, Vnd konnen darumb vff diser Erden mit groserm kreutz nit beleget werden, dan 23 I B. 3 H. (1854).
