180
das wir bey E. L. in dermassen vnsohnlichen gedancken schweben, Vnd sich E. L. aller empfangner trew nit mehr freuntlich erinnern sollen, dan eben vns vff dise weis zuschreiben, das E. L. in zweiffel weren, wie wir es mit derselben meintten etc., Alsdan E. L. schreiben den 7 Junij datirt dises vngefarlichen inhalts ist. Oob wir nun woll E. L. dem geliebten sohne ye bisweillen dises ietzigenn kriegs halben zugemuht gefuhret, Jn was beschwer vnd weiterung man stecke, wie gefarlich es auch sey sich vff Menschen gewalt oder weisheit zuuorlassen, wie vil nutzlicher aber zu Leib vnd sehlen Got den allmechtigen zufurchten etc., hat vns darzu vnser muterlich ambt, bekhommernus vnd trew, so wir E. L. halben gehabt vnd noch haben, Auch sunst frome Leut bewegt, Vnd ist Got der allmechtige als ein erkhundiger aller hertzen vnser zeug, das es muterlich von vns gemeint ist. Desselben wollen wir vns trosten vnd jm vnser gedult allein befelhen. E. L. konten wir solichs alles hiemit muterlich nit vorhalten, die wir freuntlich bitten vns mit sohnlicher antwort auch vorstendigung Jres wolgehens bey zeigern zugewehren. Got befolhen. Datum Coldingen in vnserm abzug den 29ten Julij Anno etc. 64. Dorothea von Gots gnaden zw Dennemarck Norwegen der Wenden vnnd Gotten Konigin, Geborn zu Sachssen etc., Hertzogin zw Schleswig Holstein etc., Witwe. Dorothea. Paategning: „productum Koppenhagen den 1 Augustj 64". Orig. paa Papir med Udskrift til Kongen og Segl (det danske og det saxiske Vaaben). Bilag til Nr. 123. Der alt hertzog zu Pommern an Mein gnedigste frav Konigin. 1564, 19 Juli. Durchleuchtigste konigin, was wir aus freundtlicher vorwandtnus mehr ehrenn liebs vnd guts vormugenn zuuorn. hochgeborne furstin, freundtliche liebe Muhm vnnd schwegerin. Wir mogen E. Ko. Durchl. nicht vorhalten, das wir von dem hochgelerten vnserm besondernn liebenn heinrich vntzelman der Rechtenn Licenciaten die vortraute werbung, So Jme E. Ko. Dcht. an vns zubringen befolhenn, nach der lenge angehört vnnd daraus vber vorige vngezweiffelte zuuorsicht E. Ko. Dcht. gantz freundtlich vnd vortraut gemuht, hertz vnd zuneigungk, damit E. Ko. Dcht. vns vnd den vnsern gewogen, vberflussig vnd Jm grund erfahren, Daruor wir dann E. Ko. Dcht. zum hochstenn vnd freundtlichsten danckpar, Mit der erbietung, das wir bis in vnser grubenn in allem dem, So zuerhaltung der angebornen alten vnd vnuorruckten freundtschafft vnd zuuorsicht zwischen dem Koniglichen haus Dennemarcken vnd dem Furstenthumb Pommern nutz vnd dienstlich, nichs erwindenn lassen wollen. Wir haben auch vff beschene freundt-
