202
143. 1565, 21 October. Was wir in muterlichen trewen Ehr, liebs vnd guts vermugen zuuor. Durchleuchtiger furst, Freundtlicher geliebter sohn, Wir geben E. L. sohnlich zuwissen, Das vnsere Arme Burgerschafft vnser leibgedings Stat Coldingen vber Jre schuldige pflicht willig vnd begirig ist, E. L. als Jrem Konig mit Leib gut vnd blut zu dienen vnd sich als andere gehorsame vnderthonen diser Konigreich geburlich zuertzeigen, Wie sie dan zu Got hoffen, von Jnen bisher nicht anderst geschehen sey. Vnd als nun E. L. Jungst vergangen gebots brieff haben lassen ausgehn, gemelte Burgerschafft zu Coldingen solle zum aller ersten erlegen E. L. Rentmeistern Ellert grup siben hundert Enckede daler, So sein sie Jn dem auch Jn aller vnderthenigkeit geflissen sich nach E. L. befelch zuhalten. Dieweyl sie aber von wegen Jrer Armut zu solichem gelt so balde nit zurahten, hoffen sie zu E. L. als Jrem gnedigsten Konig, E. L. werde Jre vnuermugenheit mit gnedigsten augen ansehen, Wie sie vns dan vfs vleisigst gebetten, sie derhalben an E. L. zuuerschreiben. Wan es dan, Freundtlicher geliebter sohne, ein hauff armer Leute, die nichs haben dan aus der hand in Mund, Vnd inen vnmoglich ist, ietzo strax so vil Runder taler zuerlegen, So bitten wir E. L. als vnsern Liebenn sohn, vnd so hoch als wir die Muter Jmmer bitten Konnen, Vnd sie die Arme Leut flehen vnd suchen Demutiglich, E. L. wolle gnedigst zufriden sein, das sie die begerte summa gelts, Namlich halb in Runden Talern, vnd halb an Kleiner Muntz Klipling zu zway Termin, Namlich vff Martinj vnd volgunt fastelabennt erlegen, Vnd Jnen also hierin gnad ertzeigt werden moge, Das begern wir vmb E. L. muterlich zuuerschulden, Vnd die Arme Burger wollen soliche gnedigste erzeigung vber Jre schuldige gebur in aller vnderthenigkeit zuuerdienen geflissen sein. E. L. bitten wir hieruff derselben wilferige gute Antwort. Datum Coldingen den 21ten Octobris Anno etc. 65. Dorothea. Dorothea von Gots gnaden zu Dennemarck, Norwegen etc. Konigin, Geborn zu Sachssen etc., hertzogin zu Schleswig, Holstein etc., Witwe. Paategning: Der fraw Mutter vorschrifft vor die Coldinghensere vmb frist der schatzung. Productum Kopenhagen den 10 9bris 65. Original paa Papir med Udskrift til Kongen og Segl (det danske og det saxiske Vaaben). 144. 1566, 24 Marts. Dorothea vonn gottes gnadenn Konigin zw Dennemarck, Norwegenn etc. Geborne zw Sachssen etc., hertzogin zw Schleswigk, Holstein etc., Witwe.
