205
Wir glauben wol das etliche böse leut sein werden, vnd sonderlich die so lust haben zu kriegen, die sagen werden, wir hetten lust vns in ein Newe Regierung zutringen, darumb das wir an E. 1. Reichs Rehte geschribenn. Aber welt mag sagen wasz sie will, Gott Jm himmel weist vnser hertz, das wir es vff E. 1. seitten muterlich, hertzlich, treulich vnd wol meinen, vnd vff diser Erden kein grossere freude empfahen konnen dan zuerfahren, das E. 1. einsmal durch Gottes gnad aus disem verderblichem bade in fridlichen stande widerumb gesetzt sey, Vnd das E. 1. einen gnedigen Gott habe, dan in wasz gefarlicheit leibes, Auch in was zuruckgang an land vnd leute sich E. 1. gesetzt, das erfaren wir leider taglich, vnd wolt sich solichs noch mer heuffen, Wan es war wer, das E. 1. Frantzosich kriegsvolck ins Reich forderte, das Got gnediglich wehr vnd den friden gebe zu E. 1. besten. Dan wie solich volck haus helt, wa es hinkombt, das weist man wol. Freundtlicher geliebter sohne, Wir mussen E. 1. hiemit noch einsmal vnsers muterlichen beruoffs erinnern, damit wan vns der liebe gott von hinnen fordert, wir mit frölichem hertzen sagen mogen, Das wir an geburlicher muterlicher erinnerung kein gelegenheit gesparet, Vnd bitten daruff E. 1. hertzlich, E. 1. wolle bedencken den schaden vnd vnfal der sehlen, so E. 1. in disem ietzigem erschrecklichen krieg erfolgen kan, dan Got wils hertz haben vnd kennet vnsere gedanckhen. Da nun das hertz mit buosfertigem eyffer zum friden nicht geneigt, vnd die gnadsuchung bey got nicht mit ernst geht, Vnnd durch voltrunckenheit vnd andere weltliche wollust verhindert wirt, So wirt Gotts zorn nicht versöhnet, sondern mehret die straff vnd kombt entlich alles vbel der sehlen. Daruor behuote der liebe Got E. 1., vnd geb derselben den heylgen geist, das sie christlich vnd wol leben vnd derselben befolhne vnderthonen in frid vnd liebe regieren, Vnd der Teuffel vnd seine geister kein macht daran haben mogen. das bitten wir von gott treulich, dan wir E. 1., als die vnder vnserm hertzen gelegen, seligkeit ye gern sehen. Das ¹) sich E. 1. nach Menschlichem Rhate richten vnd gedencken wolt: ietzo wollen wirs besser machen, vnd das hertz zum krieg neigen, So kan got alle menschliche vernunfft vnd anschlege mit einem wort vmbschlagen vnd aus 9. 10. machen. Got gebe E. 1. den zeitlichen vnd ewigen friden vnd behuote E. 1. sunst vor vnfal. Wir sein Got lob zimlich gesund, da es dan E. 1. auch wol gienge, horten wir als die muter gern. Mochten wir E. 1. muterlich nit pergen. Datum Coldingen 3 Maij Ao 66. Dorothea. Dorothea von Gots gnaden Konigin zu Dennemark, Norwegen etc. Widtwe. Paategning: Productum Fridrichsburg den 7 Maij Anno etc. 66. Original paa Papir med Udskrift til Kongen og paatrykt Segl. 1) Maa vist rettes til „Da". 26*
