207
solten. Dieweil aber die gelegenheit, Gott erbarms, dermassen geschaffen, das wir der muterlichen verwandtnus nach vnsers Sohns hertzog Magnussen, der so wol als E. 1. vnser fleisch vnd blut ist, hiermit gedencken mussen, Bitten wir E. 1., die wolle vns darin nicht vnrecht verdencken, Vnd sich souil demutigen diese hiebeyliegende Supplicationes vnd hendel Jr verlesen zulassen. Dan dieweil wir in dem glauben sein vnd wir selbst von E. 1. gehoret, da gleich dieses orts her brieff ankhommen, das E. 1. dieselbige nicht achten vnd horen mogen, So bitten wir wie gehort muterlich, E. l. wolle sich vff dismal so vil bemuhen ietzigen erbarmlichen zustande zuhoren Vnd sich doch vnderweisenn lassen, das der allmechtige ein eifferiger Gott ist, der kein vnrecht leidet, vnd ist ia die lautere warheit, das S. 1. derselben Vetterlich Erbtheil E. 1. abgetreten, Vnd aber zu dem ihenigen nicht gelassen noch geschutzt wirt, darzu sein l. billich gehoret, zw dem das S. l. vnuerschuldt vff E. 1. hieraus forderen vmb die Wick gebracht, Vnd dan ietzo ist das lendlein Ozel, wie oben gehort, darumb das E. 1. sich desselben anmassenn aber nicht beschutzen, von Kon. w. zw Schweden zum hochsten verderbt, Also, da gleich E. 1. dasselbige numer abtretten vnd Jrem bruder eingeben wolt, Kan sein 1. sich dauon nicht erhalten vnd ist numer schir ein weltuerlassener Furst, der nicht verdienet hat Jne dergestalt so erbarmlichen mit landt vnd leuten zuuerlassen. Wem nun aber der schimpff vff dem hals lige, hat E. 1. leichtlich zuermessen, das es alle ehrliebende wissen vnd verstehen. Wir vor vnser person haben es vff beeden theilenn muterlich vnd hertzlich gemeint vnd zugelassen, das sein 1. hierein geschicket, dan s. 1. hat sich darzu nicht genotiget, damit freundtschafft vnd gut vertrawen vff beeden seiten desto bestendiger mochte pleibenn, Aber vnser wil vnd hertz ist gar nicht gewest dergestalt mit Jrer 1. zufahren vnd zuhandlen, wie es ietzo die tagliche erfarung gibt, Vnd mussen vns nu in ietziger beschwer allein des trosten, des wir etlichen diese sach vff ihr leib vnd seel zuuerrichten befohlenn, wie sie gedechten dasselbige am jungsten gericht zuuerandtworten, die es auch also vff sich genommen. Vns ist zu derselben zeit auch vor ein warheit eingebildet worden, hertzog Magnussen gegenerstattung sey so gut als das landt zw holstein, Das doch vil anderst ist, Vnd da es gleich also wer, das doch nicht ist, so kan doch vnser armer Sohn desselben nicht geniessen, Vnd hat gegenwertig zeit die gestalt mit Ozel wie E. 1. gehort. Aber von dem genug. Wir Bitten E. 1. allein freundtlich, dieweil es E. 1. brudern hertzog Magnussen halb nicht allein zuthun ist, dan wan es vffs euserst kombt, so mag S. 1. ia das liebe brodt noch bey derselben verwandten freunden bekhommen, Sondern es ist des merertheils der armen vnderthonen halben, die ietziger zeit mit weib vnd kindern in der eusersten nott vnd elendt schweben vnd E. 1. zugesagten schutzes halben vffs bein verderbet worden. die bitten vffs vnderthenigst gleichwol neben E. l. brudern E. 1. wolle sich eins vor alles erkleren, was die so wol in Churlandt als auff Ozel sich E. 1. schutzs halben zuerfrewen vnd zugewarten, damit sie Jre gelegenheit darnach
