209
wahr zuzuschicken. Bitten derhalben freundtlich E. 1. wolle vns derselben paswort bey gegenwertigem mittheilenn. Wir werden auch bericht, das Vlrich oder her Vlrich Beer, wie er sich nennet, von vnserm Sohn von rechts wegen gesteffet worden, aber der nicht kombt, ist herr Vlrich, Vnd sol E. 1. darzu hertzog Magnussen gebotten haben nichts gegen Jme vorzunemen, dan wan solichs geschehe, wolte E. 1. Jne in lifflandt verbitten. So weist nu E. 1., das E. 1. bruder hertzog Magnus Churlandt vmb sein eigen geldt erkaufft vnd mit dem andern thausch nichts zuthun hat, ausgenommen das E. 1. dasselbige schutzen sol, So wil sich ia nicht geburen E. 1. Brudern darin auch zubeschweren. Es ist vil mer Christlicher, das der so nicht arbeitet nichts esse. Wil her Vlrich ein Ritmeisther sein vnd sich des Khorhemants schemen, so lasse er die pfrendt, vnd ist guter raht, E. 1. konnen Jne doch wol versorgen, da er gleich keine geistliche guter in Churlandt hat. Wir werden vffs vnderthenigst gebethen bey E. 1. zu furdern, damit er in Lifflandt ziehe vnd seine verlobte braut zur kirchen fuhr, Aber wir mogen es nicht thun, Dan vieleicht wil Jm der liebe Gott die ehr nicht geben Ehelich zu werdenn etc. Vff dis mal nichts mer. Befelen E. 1. gott dem almechtigen zu allem guten, vnd wunschen das seine gotliche Mt. allen boesen geistern wolle wehren, das sie keine macht an E. 1. als vnserm Sohnn, des seeligkeit wir hertzlich suchen, haben mogen. Sunst wissen wir nichts zu wunschen, dan gelt vnd gudt, damit E. 1. in dieser beschwer, menschlich zureden, vielicht wol gedienet were, haben wir nicht, Sunst aber ein muterlich hertz zw allen vnsern kindern. Datum Coldingen den 8 Maij Anno 66. Dorothea. Dorothea von Gottes gnaden Konigin zw Dennemarcken, Norwegen etc., Geborn zw Sachssen etc., hertzogin zw Schleswigk, Holstein etc., Wittwe. Paategning: Der Konigin zu Coldingen schreiben zu Lunden den 14 Maij ankommen Anno 66. Orig. paa Papir med Udskrift til Kongen og Segl (det danske og det saxiske Vaaben). Paa en indlagt Seddel: Freundtlicher geliebter sohne. Einst mussenn wir hiemit auch erwenen, Namlich da gleich vorgeworffenn werden wolt, E. 1. bruder hertzog Magnusz were E. 1. viel schuldig, So kan doch mit recht S. 1. nichs zugemessen werdenn, vilweniger mit gutten gewissenn etwas widerumb zufordernn. Dan Jre 1. habenn E. 1. vnnd vnns gehorsamet vnd vnbeschwert nach liffland gezogenn zu der zeit, da sie noch ein kind gewesenn vnd es nicht besser verstandenn habenn, Auch von E. 1. wegenn keine verstendige oder alte leut gehabt, die Jne heten regiern konnen. Man sihet das wol andere leut, die
