212
ckung verleubenn vnd vmb dieser vnser bitt willen widerumb vff freiem fus stellenn Vnd also zw den Jren in Dennemarck mit diesem vnserm diener allergnedigst vnd vnuerhindert kommen lassen, Jn massen wir trostlicher hoffnung sein, weil es ein weibsbilde vnd nun ein witwe ist, dero man naturlicher Reuerentz vnd Erbarkeit nach billich etwas vbersehenn Vnd gnad erbitten lassen sol, E. 1., als die vnder vnser hertzliebsten schwester hertz geruhet, werde sich hirein mit dermassen gnad erzeigen, Das wir sagen mogen, das diese vnsere vorbitt bey E. 1. dem geliebten Vetter fruchtbar vnd vns zu ehren vnd freundtlichem gefallen etwas gethon habe. Es ist ye E. 1. mit derselben Frawen vnd den andern bemelten personen als vnschuldigen armen leuten vnd weibsbildern nichts gedienet, vil weniger Jrenthalben etwas zubefahren, Vnd wa sie also heimgelassen vnd ledig werden, wie wir vns eigentlich vberreden, E. 1. vnsernthalb es thun werde, wirt E. 1. erstlich bey Gott ein angenemb Christlich werck thun Vnd dessen bey allen vornunfftigen lob vnd rohm haben, So wollen wirs in warheit von E. 1. zu einer hochen freundtschafft vnd nicht anderst zu freundtlichem danck vffnemmen, Dan als were es vns selbst widerfahrenn, Vnd vmb E. 1. der verwandtnus nach hinwider von hertzen gern verschulden. Gott helffe allein, das ietz schwebender erschreckliche krieg auch Blutuergiessen vnd verderben Landt vnd Leute doch einsmal moge gestillet vnd vnder vnserm freundtlichen geliebten Sohn vnd E. 1. widerumb freundtschafft nachbarlicher guter wil vnd vertrawen gewircket werden moge. Vns zwar als die diesen krieg von anfang hertzlich beweinet, kan vff Erden kein grosser hertz wehe vnd clagen begegnen, Dan das wir, vff der einen seiten die muter vff der ander seiten die muhm, zusehen sollen, das beede Ewere liebden als Christen, negste vetern vnd nachtbarn in solicher schweren feindtschafft stehen, Dardurch sich selbst Jre landt vnd leute in so grosz verderben vnd gefahr setzen sol. Es haben beeder liebden herrnn Vater hochloblicher gedechtnus bis zu Jhrem letzten Ende neben einander nachbarlich vnnd fridlich regirt, Vnd theil dem andern in freundtschafft hilff vnd forderung bewisen, daraus dan gottes segen, der vnderthonen wolffart, ruh vnd fride, auch abhalten vnfridfertiger Kriegescher leute eruolget, Das sich aber dagegen ietzo nicht wenig hohen potentaten erfrewen vnd nichts liebers sehen mochten, dan das beede Ewere liebden von Konigreichen Ehr landt vnd leut khemen, ist kein zweiffel, dan man wol weist, wan Dennemarck vnd Schweden zusamen halten, sich niemant balde in feintschafft gegen sie auffleinen dorffen. Es mus doch noch eins mal frid werden, da gleich alles verwust ist, Vnd mitlet es zwar der Almechtige godt das kein theil vorm andern obsiget, Vnd vieleicht keinem mer dan dem andern gonnen wil, wie dan solichs alles in seinem Vnuerforschlichem Rath stehet. Wir bitten vnd vermanen E. 1. als dero wir der Verwandtnus nach guts gonnen, auch zeitlich vnd Ewig verderb gern abgewendet sehen, hertzlich vnd freundtlich,
