218
Sich Alle hanndlung vf dem tage zu Wormbs zugetragenn vnnd wes Jr drauszenn Newes vorhandenn zuschreybenn. Auch dweyll Sich die welltt Jtzunndt Allennthalbenn So Seltzam Anlest vnnd wir der Abgunstigenn viell habenn, denn Allmechtigenn Gott treuligenn vnnd vleyszigenn vor vnns bittenn, Jngleichem wir widerumb thun wollenn vnnd darneben widerumb Jnn allenn gnadenn erkennen wollen. Datum vt Jn litteris. 4. Ann Doctor Jonam zu Wittemberg. 1541, 15 Maj. Christiann etc. Vnnsernn gunnstigenn grues vnnd gnedigenn willenn zuuorn. Wirdiger vnnd Hochgelarther Besonnder lieber. Ewer widerschreybenn, des datum heldt Wittembergk 3 feria post judica, habenn wir empfanngenn vnnd desselbenn Jnnhalt nach aller Nottorfft woll vorstanndenn. thun vnns erstlichenn Doctoris Martinj vnnd ewers furgewanndtenn vleysses halbenn mitt doctor Pommerano ganntz gnediglichenn bedannckenn, Wollenns auch Jnn allenn gnadenn hienwidder erkennen vnnd hettenn warlichenn gernne gesehenn, das Sich Pommeranus als deme wir Jhe vnnd allwegenn mitt gnadenn gewogenn, dem Auch vnnser vnnd dieszer vnnser Reiche vnnd gelegennhait zum teill wissenntlich zu solichem Bischoflichem Ampte hettenn gebrauchenn lassenn. Dieweyll es Jhme Aber Seynnes alters halbenn vnnd Sunstenn beschwerlichenn, lassenn wir es auch also gescheenn. Wollenn vnns auch vorsehenn, Jr werdet nebenn Doctor Martino vnnd Pommerano, (Wie Jr euch dann Jnn ewerm schreybenn erbottenn, Vund wir Anhe das keynenn zweyuell tragenn) Allenn muglichenn vleisz ankerenn, damitt Jr vnns eynenn Anndernn feynenn gelerttenn vnnd geschicktenn mann, So wir hirzu gebrauchenn muchtenn, desgleichenn auch einenn hoffprediger, der vff vnnsernn Eigenn leyb warttett, bekomenn mochtenn etc. Zum anndernn habenn wir dasz vberschickte Buch, So doctor Martinus wider herzog heintzen zu Braunschweigk hatt auszgehenn lassenn, Empfanngenn Vnnd thun vnns desselbenn Sampt denn angetzaigtenn zeittungenn vom Colloquio zu Wormbs (daruonn wir dann zum teyll vonn Hermanno Schelenn auch bericht empfangenn), desgleichenn wes D. Philippus Melanchtonn aus Regennspurg vom Reichstage ann euch thutt Schreybenn, gnedigklichenn bedannckenn vnnd vorsehenn vnns, wes fernner vonn Solichem Reichstage ann euch gelanngenn wirtt, Jr werdett vnnsz dasselbe vnuorhaltenn bleybenn lassenn. Erkennenn wir widerumb mit gnaden gerne etc. Alls Jr vnns auch fernner Antzeygunge thutt, das Jr des enntlichenn gemutts vnnd meynunge werenn, So Jr erfarenn mocht, wann wir Jnn vnnsere Furstennthumbe (das doch mitt gottlicher vorleyhunng kurtzlichenn geschehenn soll) annkhommenn, Eigenner personn ann vnnsz vorfugenn wolltenn, dasselbe wir dann mitt gnedigem
