221
attendenten zu Rypenn ganntz widderwertigklichenn gehalltenn, Wolt Jhne gernne ganntz aldar abgedrungenn vnnd Sich Ann die Stadt gesetzt habenn, do Jhme aber dasselbige nicht gelingenn wollenn, hatt er Angetzaygett, vnnser Superattendent Alhier zu Coppennhagenn der were gestorbenn, Wollte Sich derhalbenn vonn dar ab hereynner gebenn vnnd vorsuchenn, ob er zu diessem stuck Broth kommenn mochte etc. Wirtt allso hier vonn denn vnnsernn vor eynnenn aufrurer gehaltenn. Darzu vormeynenn die vnnsernn, das mit Jhme wenigk ausgericht sey, derhalbenn wir es auch allso bleyben lassenn etc. Letzlichenn so thun wir vnns gegenn Ewer personn aller vberschicketer zeittungenn als vom Colloquio zu Wormbs vnnd Sunstenn ganntz gnediglichenn bedannkenn, vnnd wollenn vnns vorsehenn, Jr werdett vnns Jderzeitt, wes vom Reichstage zu Regennspurg vnnd Sonnstenn newes vorhanndenn mittteylung thunn. Wir wollenn vnns auch ewer weyb vnnd kinnder mit dem treulichstenn vnnd bestenn befholenn sein lassenn vnnd wo der Allmechtige (alls wir dann nicht zweyuellnn) gnade vorleyhett, das vnnsere Bergkwerge Jnn Norwegenn Sich beweysenn werdenn, eyner ewerer hausfrawenn vnnd Sohnnsz nicht vorgessenn, Sonnder gnediglichenn bedennckenn, Das alles wir euch vf ewer Schreybenn, Als deme wir mitt Sondernn gnaden zugethann, Anntwortt nicht bergénn wollenn, Vnnd thun hiemit euch Sampt alle die ewrenn Jn denn Gottlichenn Schutz vnnd Schirm vnnd vnns vnnsere Landt vnnd leuthe Jn ewer Pater Noster zum trewlichstenn befhelenn. Datum vf vnnserm Slosz Coppennhagen Am Sonntage Cantate Anno etc. Jm xljten. Jnn 6. Ann Doctorem Pommeranum zu Wittembergk etc. Actum Gottorpp. 1542, 6 Januar. Christiann etc. Vnnsernn grus vnnd gnedigenn willenn zuuornn. Wirdiger vnnd hochgelarter besonnder lieber. Wir habenn ewer schreybenn datirt Wittembergk Monntags nach Barbare des vorschinnen ein vnd viertzigsten Jars empfanngenn vnnd einhalts verstanden. Vnnd als Jr vnns zum ersten antzaiget, das es nitt durch Ewer verseumnisze geschehenn, das wir pisher keynen prediger, der vf vnnsernn aignenn leyb wartett, Auch stettiglichenn bey vnns Sein mocht, vorschaffet, konnenn wir bey vnns woll ermessenn, das der Manngel Ann euch nit Gewesenn, habenn auch euch vnnd dj Andernn disfals woll enntschuldigt. Zum Andernn Souiell Antrieft, das Jhr vnns vormelt, wie Jr vorschinner zeitt Ann vnnsernn Cantzler Johan Friesenn eynes gelerthenn mans halbenn Maccabeus genant, der ein schott geborn, geschriebenn, Aber pisher vnbeanntwort pliebenn, Also wollenn wir euch darauf gnediger meynnunge nit verhaltenn, das wir warlichenn vonn 28*
