222
Solichenn schrieftenn ader eynichem bericht des Cantzlers kein wissennschaft haben, Achtenn auch darfur, das villeicht dieselbe schrifft noch zur zeit Ann vnsern Cantzler nit gelanngt, Sonnstenn Soltet Jr vor langem darauff woll beanntwort wordenn sein. Wie aber dem nu allem, dieweil Jr vns Jnn Jtzigenn ewrenn schrifftenn zuerkennen gebenn, das derselbe Maccabeus vor vill andernn mit lehre, vorstannde, geschicklickeit vnnd fromigkeit vonn got begabet, das er ewers bedunckenns vnnser vniuersitet zu Coppennhagenn ein sehr nutzlicher vnnd diennstlicher man sein mocht, Auch das er Sich (wiewoll er vonn denn hernn vonn Straszburgk gefordert vnnd Jhme eyne stadtliche besoldung zugesagt) doch nit weydter Als vf ewer bewilligung vorsaget hette, Er sich auch vileicht lieber hereynner nach vnnser vniuersitet, da mann mit seiner Leyenn sprache besser als Ausszerlants zufriden sein mocht, begebe, So habenn wir darauff Jegennwertigenn den Erbarnn vnnsernn Secretarien vnd lieben getrewenn hermannum Schelenn mitt zerung vnd allem beuelh Ann euch abgeuertigett. Wo er nu hereynn zuziehenn willenns, So mag er Sich mit gedachtem hermanno scheelen Ann vns vor fugenn, Wollenn wir Jnenn Alsdann, wo er vnnser vniuersitet diennlichenn sein wirdett, wollenn wir Jnen Alsdann gernne darein fordernn. Aber fur allenn dingenn sehenn wir gernne, das er Sich erstenn drauszen zu Wittembergk, Ehr ehr Jnn vnnsere vniuersitet komme, doctor Theologie promouiren liessze etc. Was den Anndernn Nidderlenndischenn mann, der vns vor ein hofprediger diennlich, Anlangt, Woltenn wir gernne einenn gelerthenn vnnd geschicktenn Mann habenn, denn wir ye zu weylenn Jnn vnnsernn Anliggenn Jnn geistlichenn Sachenn Raths gebrauchenn mochtenn. Seind demnach wol zufriedenn, das derselbe mit gedachtem vnnserm Secretario vnnd Maccabeo Ann vnns komme. Werden wir dann vormergkenn, das er vor eynenn hofprediger geschickt, Auch der sprach halbenn vnnd Sunst diennlichenn, wollenn wir Jhnenn gernne Annhemenn, Auch mit gnugsamer vndterhaltung vorsehenn lassenn. Wurde er vnns aber nicht dienenn, so woltenn wir Jhnn widerumb mit notturftiger zerung vorsehenn Ader Auch alhier zu Anndernn diennstenn forderlichenn erscheynenn. Souiel den Bischof belangt, das Jr Anntzaigett, Jr wolte euch derhalbenn lieber mit vnns vnndterredenn dann schreybenn, Muget Jhr wisszenn, das wir warlichen gleichsfals begirig der vnnd annder hochwichtigenn Sachenn halbenn vnns mit euch zu vnterredenn vnnd dar Jnnen ewers Raths zugebrauchenn. Begernn nochmals gnediglichenn, Jr wollet vorigenn vnnserm Schreibenn nach Allen muglichenn vleisz Annkerenn, damit wir zu forderung des gotlichenn wortts einenn geschicktenn vnnd gelerten mann ann des abganngnenn stadt erlangenn mochtenn. Darnebenn wollenn wir euch nicht verhaltenn, das vnns die Professores vnnser vniuersitet zu Coppennhagenn zu etlichenn mhalenn bitlichenn Anngelanngt, das wir ewer Personn ader aber einen Andernn etwa geschicktenn vnd gelertenn mann, der ein berumbter Scribent were, denn gedachte vnsere vniuersitet vor Jr heubt gebrauchen,
