223
dieselbe auch dardurch Jnn eynenn beruf vnnd nhamenn kommenn mochte, vorschreybenn woltenn. Nun werenn wir warlichenn nit vngenaigt Jnenn Solicher Jrer bitt nach der gleichenn mann, vnnd ob es vnns auch Schon was tapfers kostenn solt, zuuorschaffenn, Wolten auch niemannts lieber denn ewre Person Ann Solichenn orthenn wissenn vnnd sehenn, Derhalbenn wir ann euch mit gnadenn gesonnenn vnnd begertt habenn wollenn, Jhr wollet euch, wo es Jmmer zuthuenn muglichenn, vnderheblichenn widderumb hereynn zu vnns begebenn, Dann wir gernne eynenn Solchenn Altenn Pomern vnnd Speckesser hettenn, der auch villeicht dj lufft disser lannde besser als ein Annder vertragenn konndte, Wir woltenn auch dennselbenn dermassenn vorsorgenn, das er vnns zubedanckenn habenn solt. Wo Jr aber Jo euch dasselbenn (des wir vnns doch nit verhoffenn wollenn) beschwerenn thet, das Jr vns dann, Als der mit solchenn gelerttenn leuthen Jnn kuntschaft, Etwann einenn Andernn gelerthenn vnnd berumpten scribenten zuhandelnn mochtenn, dann derselbig bey vnns dermassenn Als Jn Andern vniuersitetenn vnterhaltenn werdenn solte. Wir stehenn aber Jnn genntzlicher hofnung, das Jr euch selbstenn zu vns vorfugen werdenn. Fernner so wollenn wir euch nit bergenn, das wir (dweil wir numehr mit hulf des Almechtigenn Jnn vnnsernn furstennthumbenn Ankommenn vnnd villeicht alhier nit lannge verharrenn werdenn) mit bewilligung vnnser Lanndtschaft die Kirchenn Ordnunge, Jnn masszenn wir dieselben Jn vnnsernn Reichenn dennemarcken etc. Angericht, Auch bestettigenn vnnd Renouiren, damit alle Ceremonienn vnnd gebreuch der Kirchenn Ordenntlich eintrechtig vnd gleichmesszig gehaltenn, Auch dardurch das gotliche wort gefordert werdenn mocht, Hiertzu wir dann auch niemannts lieber dann ewer aigenn Personn, Als der disser vnnser lande gelegennhait, Auch wes wir alhier vor leute habenn, zum teill wissenntlich, zuuoltzihung vnd bestettigung solicher Kirchenn Ordnunge habenn woltenn. Begern derhalbenn nochmals gantz gnediglichenn, Jr wollet euch Jnns erste hereynner an vnns vorfugenn vnnd zu solichem Christlichenn werck gebrauchenn lasszenn. Damit Jr auch desto ehr abkhommenn mocht, So habenn wir hienebenn ann denn hochgebornnenn furstenn vnnsernn freuntlichenn liebenn Oheimenn denn Churfurstenn zu Sachszenn etc. geschriebenn vnnd gepeten, das Sein L. vnns zu freuntlichem gefallenn euch ein zeit lanng ann vnns zukommenn vorleubenn wolle. Verhoffenn vns, S. L. werdenn Jmselbenn vnnbeschwertt sein, Jm fall aber das Jr Jo nicht abkommenn konndtenn, So wollet vonn vnnserunt wegenn mit doctor Martino Luther, Philippo Mellanchtonj vnnd doctorj Justo Jone Souiell hanndlenn, das wir der eynen an ewre stadt bekhommenn mochtenn. Aber wir wollenn vnns entlichenn zu ewr Person, Als zu der wir vnns Sonder guts vorsehenn, vortrostenn, Jr werdett euch selbstenn ann vnns zuuorfugenn vnnbeschwert erzaigenn. Wes Jr nu hierynnenn zuthun gesinnet, das wollet vnns Jns erste vorstenndigenn, Wolten wir mit Reformirunge Solicher Kirchenn Ordnung solanng stillstehenn pisz vf ewer ader der anndernn zukunfft.
