228
10. Ann doctori pommeranum vonn wegenn Bernnhardt friszenn geschribenn Jm selbenn Rath tzusenndenn etc. 1542, 22 October. Christiann etc. Vnsernn gonstigenn grus vnnd gnnedigen willenn zuuornn. wirdiger vnnd hochgelerter lieber besonnder. wir mugenn euch gnnediger meinnung nicht Bergenn, das der Achtbar vnnd wollgelert Bernnt friesz alhier ann vnns kommenn, welchenn wir dann in vnsere vniuersitet annemen lassenn. Dieweil er dann nit maigister ader Licennciat promouirt, habenn sich die professzores gemelter vniuersitet, das sie Jne alszo zulaszen soltenn, beschwert, vnnd thunn vast vf Jre Statutenn vnnd priuilegienn, so wir Jnenn gegebenn, drenngen. wie woll wir nun mit Jme Bernnhardt friszenn, das er sich aldar inn gedachter vnser vniuersitet mochte promouirenn lassenn, gehanndelt, szo fult er sich doch im selbenn ganntz beschwerlichen, wie ir dann aus seinnem nebenn schreibenn vornemenn werdet. dieweil wir aber nun in deme nicht gernn vnsernn gegebenenn briuenn vnnd siegeln zu widernn thunn Vnnd doch gemeltenn Bernhardt friesenn, dieweil er einn gelerter vnud geschickter mann, der vnser vniuersitet wollnutzlich vnnd dinnlich seinn kann, nicht gernn vorlassenn woltenn, So wollenn wir an euch gnnediglichenn gesonnenn vnd Begert habenn, Jr wollet vnns hier jnnenn euernn rath mitteylenn vnnd auch hierauf vnns vnnd vnser vniuersitet euer gutbedunnckenn bey gegennwertigem mitteilenn. Weil ir auch Jtziger zeit, wie wir bericht, binnen hildennsheim seinn Vnnd Aldar die Ordinancienn der Religionn sachenn annrichtenn vnnd Bestettigenn helfenn sollet, So Begerenn wir auch gnnediglichenn, ir wollet vnns euernn zustanndt vnnd wie sich alle sachenn zu tragenn schriftlichen vorstenndigenn. Letzlichenn so wollenn wir gnnediglichen begert habenn, Jr wollet vnns zuuorstenn gebenn, was ir des hofpredigers halbenn ausgericht, ob wir einnenn Bekommen ader nicht, vnnd wo ir mit einnem gehandelt, wie balt wir wol denselbenn hiereinn Ann vnns erlanngenn mochtenn, dann wir einnes gelertenn vnnd geschicktenn hofpredigers groszen mangell habenn. Wollet euch indeme, wie wir keinnenn zweiuel, forderlichenn ertzeichenn. Das wollenn wir vmb euer personn, Jnn derselbenn pater noster wir vnns hirmit Beuhelenn thun, Jnn allenn gunstenn vnnd gnadenn erkennenn. Datum Odennsehe Suntags post Gallj Anno etc. Jm xlijten. 11. An doctorem pomeranum zw Wittennbergk etc. Datum Gottorp dinstags nach conuersionis paulj Anno etc. xliij. 1543, 30 Januar. Christiann etc. Vnsernn gunstigenn grus vnnd geneygtenn willen zuuornn. Wirdiger vnnd hochgelarther besonder lieber. wir habenn ewer schreyben an vns auss
