229
wittembergk Freytags Jn den weynachten gethan, Alhier zw Gottorff empfangen vnnd alles Jnhalts nach der lenge verstanden. Souiel nun erstlich denn hoffprediger anlangen thut, sein wir euers darin gehabtenn vleysses mit gnaden danckbar, haben auch eurem getreuen Rath gefolgeth vnnd Nicolaum kragen fur vnsern hoffprediger bestelt vnd Angenommen. Vnnd were Jn diesem der entschuldigung Auch der dancksagung von wegen der marder ohne noth gewesenn, dan wir wissenn woll, das Jr vmb vnsernt willenn keynen vleys spareth, Darumb wir auch euch allen gnedigen willen vnd wolthat gern ertzeygenn. Des herings vnd der putter halben, die wir euch, Doctori Martino vnd philippo vorschriebenn, ist vns zw keynem gefallenn geschehenn, das es nicht woll vnd zw gleich zur stede kommen. Dieweyl wir aber nicht eigentlich vns entschlissen konnen, durch wen wir euch dasselbe jerlichs zuschickenn mogen, So ist vnser begerenn, Jr wollet selbst vf einen procurator denckenn, der euch solchs vf vnsern vncostenn am fuglichsten von Lubeck abe nach Wittembergk schicken muge. Wir habenn die bestellunge vnd den beuehl bey vnserm zollner vff Falsterbw thun lassenn, das er solche hering vnnd puttern gewisslich nach Lubeck senden soll. Allein das wir mugenn vorstendigeth werdenn, An wen Jr das habenn wolleth, soll hierin kein weyterer mangel sein. Das Jr bittet, wir woltenn Magistro Petro genner Auch Nicolao Ripensi zu vnter haldunge jrer studia mit gnediger steur behulfflichenn erscheinen, so vberschickenn wir vf dieselben euer vorbith euch hunderth gulden muntz, dauon jr viertzigk Magistro petro genner, Paulo von nimwegen dreyssig vnd Nicolao Ripensi dreyssigk zustellenn vnnd vberanthwortten mugeth, wusten wir Auch euch jn Anderm genedigstenn willen zuertzeigen, thetten wir, wie Jr wist, gerne. Betreffende das euch furkommen, wie die Hochgeborne furstin vnser freuntliche liebe schwester Elisabeth freulein zw holstein etc. einen fursten haben solthe, Soll euch daruff vnuorhalten sein, das Jre liebe dem hochgebornen fursten vnserm freuntlichenn liebenn Ohmen hern Magnussen hertzogen zw Meckelnburgk etc. zugesagt. der Almechtige vorleyhe sein segen vnd gnade dartzw. Amen. Wyr haben auch Jn schlissunge dieses briues die zwo biblien, dauon jr vns vorhin geschriebenn, von hamburgk durch einen bothen vnnd nicht durch Niclas hardenn empfangen. Thun vns vor solche, sonderlich das ehr Martinus luther Doctor vnnd philippus Melanchton neben euch Jre handtschrieften darein getzeichent, gegen euch vnd Jnen mit allen gnadenn bedanckenn vnd haben daran ein sonderlich guts vnd gnediges gefallenn. Wollen auch dieselben zw eyner ewigenn gedechtnus vnd Testament vmb eurent vnd jrentwillen, Als die da dem buchstabenn gemess, vnnd durch euch corrigirth vnnd gebesserth, behalthenn vnd vns treulich beuolen sein lassenn. Nach dem wir auch Jn der vorrede des Testaments, so doctor Martinus gemacht, gelesenn, das die bucher vbel vnd bose nachgedruckt, dardurch dan wir als ein leyhe baldt zw eynem misvorstandt kommen mochten, damit wir aber den reinsten vnd cor- 29*
