231
furs erst der zeittunge auch fur die Bucher ewers vleisses mit allen gnaden bedancken, zweiffeln nich, jr werdt vns dieselbigen zw rechter zeit woll schicken. Was die vorschriebene Buttern vnd heringe antreffen thut, haben wir die bestellunge gethan, Das euch dieselbigen alle jar gewiszlichen, auch das nachstendige, solle geschickt werden, haben auch mit hans Resen alhir selbst geredt vnd bey Jme die vorschaffunge gethan, Das solchs nicht mer moge vorseumet werden. Wir vberschicken euch auch ewer bit nach bey dem gotlander Olauuo ein hundert thaler, die wollen vnder Magister Peter Genner, Olauum, Paulum von Nimwegen Vnd Gurgen stur, welcher von Hadersleben ist, teylen, vnd haben dem olauuo souil vber diss gebenn Lassen, damit er seine schult betzalen muge. Wusten wir euch vnd doctorj Martino jn einem mehrem gnedigen willen zuertzeigen, thetten wir gerne. Deyweil jr dan auch zuwissen begert, wie es mit vnserm Krige, daruon jr nichts gewisses erfaren kontet, stet, So wollen wir euch gnedigen nicht bergen, das wir aus hochdringender vnd vnuorbeygenglicher not der key. Mat. vnd derselben Erbnidderlanden, dieweil wir vber vilfaltig vnser fridlich Christlich Konniglich erbiethen, bitten vnd ansuchen nichts anderst als schimpff schaden vnd nachteil erlangen muegen, offentlichen entsagen lassen, Vnd daruff zu der erlaubten gegenwher vnsere Schiff mit einer gueten antzal Krigsvolck vff der Key. Matt. Erblande veintlich vnd thetlich, wie sie vff vns zunemen abgefertiget. got der Almechtige vorleyhe vns zu sollichem sieg geluck vnd wolfart. Vnd wiewol wir, got weyss, zu aller disser handlunge ane vnser vorursachunge genottiget kommen vnd alwege ein gut vortrawen vnd zuuorsicht zu der Key. Mat. gehabt vnd getragenn, vns auch daruff vortrostet der Key. Mat. wurde das alles auch vnser hohes erbieten angesehen zu gemuet vnd hertzenn gefurt haben, wes vns aber vber solliche vnser gute zuuorsicht vnd hohes vortrawen beiegnet, das ist zum teyll numer aller welt wol kundig. Dan als wir jm handel gestanden vns mit der Key. Matt. zuuortragen, friden ader anstandt zumachen, So sindt darzwischen die Burgundischen zugefaren vns etzliche Schiff vnder vnserm Reiche Norwegen, darunter eine jacht mit etzlichem Silber gelt vnnd Cleinodien gewesenn, Auch vns sonst etzlichen schiffe Jn der sehe zuuorhin genommen, das volck zum teyl vnuorschulter sachen jemmerlichen entheubt vnd vff rade gesatzt. aus wilchem allem do wir gesenn, das vns widder erbieten vnd bitten geholffen vnd man also veintlich vnd thetlich mit vns vmbgangen, sindt wir vorursacht widderumb zur gegenwehr zugreiffen vnd vns vnser Reiche, Lande vnd Leuthe vor dem vbermutigem gewalt zuschutzen vnd zuerretten. Begern demnach gnediglich, jr wollet als vnser vatter denn Almechtigen vor vns vnsere Reiche, Lande vnd Leuthe fleissig bitten, das er vns nicht allein von solchem eigengewaltigen vnbillichen thetlichen der Key. Matt. vnd derselben Erbnidderlanden furnemen erleddigen, Sondern auch vns als denn genottigten sieg vnd geluck geben vnd vorleyhen wolle, wie wir dan zu dem Almechtigen hoffen, er werde sich vnser vnschult annemen, vnd vns aus dissen wie aus allenn andern noten wol
