233
ortenn wissett darzu Jr gefallenn trugett, solichs wollet vnns vermeldenn, Wollen wir vnns yderzeit darinn gnedigst zuerzaigen wissenn. Solchs wolttenn wir Euch als deme wir mit Allenn gnadenn gnaigt gnedigster mainunge nicht bergenn. Thun euch dem Allmechtigen Ewigenn gotte Jnn seine gnedige bewharung, vnns aber vnnd vnnsere geliebte gemahell, Junge herschafftenn, Brudere, Reiche, Lannde vnnd Leutte Jnn Ewer Gebeeth beuhelenn. Datum vff vnnserm Schlos Rennsburgk, vt supra. 14. An doctor Pomeranum zu Wittemberg. Actum Rensburgk Dinnstags nach conuersionis Pauli Anno Domini xvc vnd xliiij. 1544, 29 Januar. Christian etc. Vnnsernn gunstigenn grus vnnd gnedigenn willenn zuuornn. Wirdiger vnnd hochgelartter besunder lieber. wir habenn ewr schreiben datirt wittemberg denn vijten tag januarij Empfangenn vnnd alles jnnhalts eingenhommen. Thun vnns erstlichenn vor solche ewre Cristliche Trostunge, Auch das jr, nebenn doctori Martino, Philippo Melanchtoni sambt andernn gelartten zu wittemberg vnns, vnnsere freuntliche liebe gemahell, Junge herschafftenn vnnd bruder, Nichtswenniger auch vnnsere Reiche, Lannde vnd leuthe dermassenn jnn ewerm Christlichenn gebethe lassenn beuholenn sein, vffs gnedigist bedancken, Mitt erbiethung, do wir dasselbe hinwidder warmit zuuorschuldenn wustenn, das es ann vnnserm willenn nit erwinden solt. Vnnd gesinnenn nochmals gnediglichenn, Jr wollet Jnn diesenn gefarlichen vnnd geschwindenn zeitten vns, vnsere freunttliche hertzgeliebte gemahel, junge herschafften vnnd bruder, Auch vnnsere Reiche, lannde vnd leutte ewerm Cristlichem gebethe beuholenn sein lassenn. Wir haben auch das jr sambtlichenn jnn frischer wolmugennder gesuntheit vonn dem allmechtigenn erhaltenn, gernne angehortt, Sollet gleichsfals vnns vnd die vnsernn, dem herrn sey dannck, derselbe vns vonn allen teilenn zu erbreitterrung seines gotlichen vnnd allein seligmachendenn worts langwirig darinnen frieste vnd erhaltte, Auch itziger vnser vnnd der vnnsernn obliegende beschwerung, wie wir zweiuels an, Auch solchs seiner almechtigkeitt heimgestelt habenn, enthebenn vnnd enthnemen wolle, auch wissenn. Wir sind auch der Tröstlichenn hoffnung, das nach des Almechtigen willenn wir von dieser weldt nit scheiden wollenn, eher dann wir vnns noch einsmalls, wie wir dan nichts liebers vnnd erfrewlichers sehenn mochten, mit Euch dessgleichenn doctori Martino Luthero vnnd Philippo Melanchtoni personlichenn vnterredenn. Vnnd begernn, jr wollett vnns schriefftlichenn vorstenndigenn, wann vnnd zu wilcher zeit jr vor ewer person am bestenn zu vnns kommen konth.
