234
Souiel die beidenn Magistrj Paulum vonn Nimwegenn vnnd Johannem Rypensem belangt, habenn wir gernn erfharenn, das sich dieselbenn jnn jrem studio dermassenn anlassenn. Vberschickenn Euch darauff vf ewre furbit hirmit Ein hundert Taler, dieselbenn wollett nach gelegennheit vnnd als es euch vor gerattsam vnnd guth ansiehett vnndter sie teylenn. Die Bucher betreffenn, halttenn wir euch aus angezaigtter vrsachenn gnediglichenn vnnd woll entschuldigt, Vnd begernn jr wollett vnns mit zufelliger pottschafft das Buchlein die Ermhanung vom Sacramentt des Altars, wilichs doctor Martinus Luther gemacht, Desgleichenn wes sunstenn Newes vorhanndenn nebenn denn Anndernn buchlein, daruonn jr vnns geschriebenn, gebundenn vbersenndenn. Wasz dieselbenn gestehenn, wollenn wir Euch zu genedigem danck erlegenn lassenn. Letzlichenn mugenn wir Euch nitt pergenn, das wir aus doctoris Martini Luthers schreybenn Souiell vermergkt, das es vmb vnnser vbersanndte vittalienn nicht recht gestalt, welichs vnns dann, wo dieselbe nicht so guth vnnd vollkommenn, wie wier sie euch gernn gunthenn, wir auch vnnsernn beuelhabernn Euch zu vbersenndenn zuuornn mitt ernnst beuholenn, alldar annkommen vnnd euch zugeselt were wordenn, getrew-. lichenn leydt. Wollenn derhalbenn ann euch gnediglichenn begertt habenn, Jhr wollett vnns alle gelegennheitt sollicher vberschicktenn Butternn vnnd hering, vonn wehme jr die empfanngenn, Auch ann welichem orthe vnnd vonn wheme jhme dieselbenn vberanntwurtt wordenn, schriefftlichenn verstenndigenn, darmit wir hirnachmals ein annder auffsehenn vnnd bestellunnge darinnenn haben mugenn. Welichs wir Euch, als deme wir mitt besundernn gnadenn gewogenn, vff ewer schreybenn nicht bergenn wollenn. Vnnd Thun hirmitt euch dem Almechtigenn Jnn seine bewarung, vnns vnnd die vnnsernn aber wie anngezaigt Jnn ewer Pater Noster beuhelenn. Datum vt supra. 15. Antwort an doctorem Pommeranum zu Wittembergk Belanngennde die Butternn vnd heringe, so ihme kon. maiestat jherlichen vorschrieben. Actum Rennsburg freittag nach dem suntag sexagesime Anno domini 1544. 1544, 22 Februar. Christian etc. Wirdiger vnnd hochgelarter Besunder lieber. Ewr schreibenn habenn wir sambt vberschickten Buchern Empfangenn vnd gantz vngerne vornhommen, das es mitt vnserm geschenck so vbel zugehet. Wiewol wir es ye vnd alwege vnnsernn Ambtleuten mit ernst vleissig zubestellenn vnnd euch was tuglichs vnd guts zuschickenn jun beuel gethan, Wissenn wir doch nit wie sie es darmit gehalten. Wir haben aber ewernn brief benebenn hans Resenn Quittantz vnd Zettel an vnnsernn Stadthalter vnd
