235
Renthmeister zu Coppenhagenn geschickt vnnd Jhnenn dornebenn Schreiben lassenn sich zuerkundenn vnnd vnns zuuorstendigenn, wie es doch darumb gelegenn vnd gehaltenn wordenn. Vnnd ist vnns warlich getrewlich leydt, das Jhr es nicht so guth, als wirsz euch gernn gunnenn, empfangenn. Wir schickenn euch aber bey gegenwertigem Nicolao Hardernn hundert Taler, daruor mugt Jr das vbriege oder nachstendige keuffenn vnnd denn andernn hernn doctori Martino vnnd Philippo dasselbige zustellenn vnnd vberanntwurttenn lassenn, vnd damit hirnachmals kein vorseumnus mehr darbej sein vnnd Jhr was gutts bekommenn muget, So habenn wir vnnserm Renthmeister Heinrico Schulttenn jnn beuelh gethan, das er die puttern vnd heringe jeder Jhar zu Hamburg Keuffen soll, vonn dar Jhr dieselbenn zubekommen vnnd zufordernn habenn werdett. Do Jr nun solichs durch diesenn Nicolaum Harder, weil Hanns Resze hirin seumlich, vberbringenn vnnd bestellenn lasszenn wollett, das stellenn wir Jnn ewer selbs gefallen. Wir thun vns auch fur die vberschicketen Bucher gantz gnedigst bedancken Vnnd begernn gnediglich, Jr wollet vns Jderzeitt so wes Newes ausgehet zuschickenn. Vnd dweil dan vil falscher Bucher vnter guttem Namen ausgehen, das sich nit wol dafur zuhutenn, So wollet dieselbenn bucher, die Jr vnns also schicken werdet, mit Ewer oder doctoris Martini handenn vnderzeichnenn, damit wir zusehen, das dieselbigenn mit Ewr vnnd der Andern gelarthenn willen vnd Approbation ausgangen sein. Wir begernn auch gnediglich, so Jr einen vberlendischenn Prediger bekommen kontet, Jr wollet mit demselbenn handlen, ob er sich vf vnser Bergwerg Jn Norwegenn wolt begebenn, dann aldar die Bergleuth Niemants [haben], der Jhnen gotts wort predigenn oder lerenn kan. Es wollen Jhnen die Bergleute vf Jhren aignen kosten ehrlich vnd wol vnterhalten. Jr werdet hirin an ewrm vleis nichts Erwinden lassen, Erkennen wir jn gnaden gern. Das wolten wir euch, als den wir mit alln gnaden gewogen, gnedigster meinung nit pergenn etc. Datum vt supra. 16. Antwordt ann doctor Pommeranum superattendenten zu wittennberg dancksagung vnnd annderst belanngennde. Actum zu Flensburg mitwoch nach Johannis baptiste Anno 1544. 1544, 25 Juni. Christian etc. Wirdiger vnnd hochgelarter besunder lieber, Wir habenn ewer Jungst schreibenn Quasimodogenitj datirt empfangenn vnd vnnter Anderm gnedigst vormergkt, das yr euch ausz christlichem bewegenn vnnser obligennd Sachenn in derselbenn cristlichenn gepet beuholenn sein lassenn, Des wir dann sondernn gutenn gefallenn, Seind euch auch derhalben gnedigst danckpar. Vnnd wollenn euch demnach nit vorhaltenn, das wir aus vorleihung des Almechtigenn mitt Keysr. Matt. durch die gepflegte I B. 4 H. (1855). 30
