236
handlungn zu Speyr fridenn erhaltenn. Wollet derhalbenn vnnsernn eynigenn heilandt denn hernn Christum der ertzaigtenn gnaden dancken vnnd weiter bittenn helffenn, das der Ewiege barmhertzige gott solchenn vorlyhen Friedenn zu seinen Ehrenn vnnd gemeinenn pestenn bestenndig geruhenn vnnd erhalttenn wolle, Auch vnnser person vund die vnsernn, Reiche, Lannd vnnd Leuth, das die bei warhafftiger Relligionn erhalttenn vnnd nach des hernn wolgefallenn Jm fridenn Regirt werdenn mugenn etc., Jn christlichem beuelh habenn. Vnd so es ewr gelegennheit sein konndt, hettenn wir auch wol neygung vnns noch einst mit euch zuuntterreden. Gesynnenn gnedigst, Jr wollet vnns bey nehster potschafft, ob vnnd wenn yr euch zu vns zukommenn fuglich zuuorleddigenn, souil muglich vormelden. Der enttschuldigunng yr vorpitlichn Ansuchung zu mildenn Sachenn vnnd hulff der Armenn Studenttenn Jst vonn vnnotenn, dan wir zu gottes Ehre vnnd gemeynem pesten ein vilmehrers schuldig, Wollenn vns auch derhalbenn mit hulff des hernn furder vnd sunderlich weiter dann piszher, so wir zu rhue gelanngenn, zuerzaigenn wissenn. Vnnd ist vnns nicht enttgegenn, das yr dasz zugeschickte gelt zn vnnterhaltung der Armen gesellenn ewr antzaige nach vorwenndett. Wir habenn Auch ewrer furbit nach die, Als mit furbitlichem schreibenn diser zeit Ann vnns gelanngt, nach gelegennhait abgelegt vnnd zuuorsehenn beschaffenn lassenn. Vnnd souylbelanngenn die profiandt, Als Wir euch vnnd vnnsernn besundernn liebenn Martino Luthero doctorj vnnd philippo Jarlich vorschribenn vnnd zugebenn beschaffenn lassenn, Habenn wir der vnnsernn erzeigung, vnnd das dermassenn nicht nach vnnserm befelh damit gehanndelt, keinenn gefallenn, Erachten auch das yr wissenns, das es vnns entgegen. Habenn auch solchs furder zuuorkommenn denn furschlag, dauonn ewr schreibenn meldet, eher dann ewer briff ann vns gelanngt, bewogenn, Derhalbenn auch nehst das bewuste gelt aus aignem bedenckenn an euch geferttiget. Schickenn euch auch demnach vnnser vorschreibunge Ann stadt der Andernn Jerlich vff anderthalb hundert guldenn Muntz, dauonn doctor Martinus vnnd Philippus vnnd Jr yder Funfftzig guldenn habenn sollenn, vnnd soll solich geltt lauth der vorschreibung ydes Jar durch ewernn aignenn Potenn, doch vf vnnser belohnung, bei vnns vff Jacobj, damit daran nit manngel, gefurdert vnnd empfangen werdenn. Wir schickenn euch auch vonn disem Termin Jacobj kunfftig himit bei briffszeigernn solliche Anderthalbhundert guldenn, Die werdet Jr Ann die gepurennd orth zuuorreichenn wissenn vnnd die vorige vorschreibunnge Ann euch nhemenn. Vnnd wollett vnnsz ye, das dermassenn mit der prouiandt Anhero, doch vnns vnwissennt, gehandelt, bei denn Andernn hern, die vnns dermassenn wie yr nicht kennenn, mit dem bestenn, Als Jhr zuthun wist, entschuldigenn vnnd anfurdernn, das sie vnnser wolmeinliche Neigung vnnd das geringe wolttenn zugefallenn habenn.
