237
Es ist auch desz rechenns, dauonn Jnn ewerm schreibenn angetzeigt, Wem Yr was vonn denn Notturfftigenn Studenttenn gebenn vnd weiter zuzuwendenn gnaigtt, vonn vnnothenn, Dann wir guth wissenns, das solichs christlich vonn euch angelegt, wie wir dann auch euch dasselbe heimgestalt. Vnnd wollett vuns vff vnnser betzalung vnnd costenn mit dem buchlein, dauonn in ewerm schreibenn, vnnd ob auch sunst was ausginge, bedenckenn. Hiemit wir euch Jnn schutz vnnd schirm des allerhochstenn, der vnns allein bey seynem heilsamenn wortt erhalttenn vnnd dasselbe zu seynenn Ehrenn weitter ausbreyttenn vnnd gegenn die widderwerttigenn handthabenn wolle, thun beuhelenn, Vnd seind euch als vnnserm besundernn liebenn mit gnadenn vnnd allem guttenn yderzeit gnaigtt. Datum vt supra. 17. Anntwordt ann doctor pommeranum zu wittemberg danncksagunng vnnd annderst belangen. Actum Gottorpp am dornstage nach laurenti anno domini fuufftzehenhundert vnnd im xxxxiij. 1544, 14 August. Christian etc. Ehrwirdiger vnnd hochgelartter besunder lieber. Ewr schreibenn bei Schlesier dem Bothenn, Jtzundt Ann vnns gethann, habenn wir empfangenn vnnd daraus vndter anderm vorstandenn, Wilcher gestalt vnnsere ohmenn vnnd Schwegere zu Pommernn vnnd das Capittel zu Camin euch durch yre Legation dasz Stifft Camin vfftragenn lassenn vnnd zu eynem Bischof erwelet, Auch wes Jr der vorschreibung halbenn, So wir euch, doctori Martino vnnd Magistro Philippo gegebenn, ann vnns gelanngt etc. Vnd thun vnns erstlich der Christlichenn wuntschunnge des Friedenns vnnd das yr vnns in Ewr Christlich gebet empfolenn sein lassett, gantz gnedigst bedanckenn. Vormerckenn nicht Annderst, dann das Jr vnns vnnd denn vnsernn glugliche zeitliche vnnd Ewige leibs vnnd der Seelenn wolfartt gunneth. Vnd wolln euch hinwidder gnedigst nit verhaltenn, Nachdem der Almechtige vnns gnediglichenn der beschwerungenn, so vnns der langwirigenn Kriege halbenn obgelegenn, abgeholffenn, Das auch die vheidsachenn mitt vnnsernn vngehorsammenn vnterthanenn denn dittmarschenn abgestalt. Verhoffenn es werde der Almechtig furter was zuerhalttunge seins götlichenn worts zeitlichenn fridenns vnnd gutts Regimennts dienlich vorleihenn, Wie wir dan darumb embsigs vleisses bittenn. Vnnd als ir dann in ewerm schreibenn, wes euch der Bischoflichenn Election zu Camin furstehet, gemeldett, Habenn wir, das yr solcher gestalt vonn ewrem Vatterlannd ersucht, gantz gernne vornhommenn. Jst vnns auch antzuhorenn erfreulich, Das das Stiefft gottlichem Nhamenn zu Ehrn vnnd zu auszbreittunnge des Allein Seligmachendenn worts einenn solichenn christlichenn mann zu einem Bischoff begerenn, 30*
