238
Vnnd thun Euch derwegenn vonn gott dem Allmechtigen gluck heil vnnd alle wolfart wunntzschenn, Gnedigst gesinnende, Jhr wollet vnns nach gefelliger gelegennheitt fernnernn bescheidtt vnnd zustandt derhalbenn, vnnd wes Jr hirin bewilligt, nicht vnuormeldet lassenn. Souiel die voranderunge der gegebennenn vorschreibunge betreffennd, das euch vnnd denn andernn hernn daran zu willenn gescheenn vnnd das euch das geltt derhalbenn zukommenn, Jst vnns zu guttem gefallenn gelanngt. Vnd Als wir iungst ann euch geschribenn, das wir die vorschreibungenn, wann Jr ann vnns gelanngtet, nach ewrem Rat zu andern bedacht, Hettenn wir warlich nicht liebers gesehenn, dann so es Jmmer die gelegennheit gewesenn, das Jr nochmals vnns personlich ersuchen mugen. Weil dasselbig aber diser zeit vorbleibenn mussenn, Wollenn wir doch noch hoffenn, es werde sich noch ein mal dermassenn zutragenn, Das wir vnns mit euch sehenn vnnd sprechenn mugenn. Vnnd werdet vns demnach die altenn vorschreibungen widderumb zuschickenn, Dariegenn wir die voranderttenn Euch hinwidder gefertigt vbersenden wolln, Vnnd vnns darnebenn ewer gelegennheit fernnernn bericht wissenn lassenn. Des geldes halbenn, So wir euch vnter Magister Paul, Johann Ripensem vnnd andere zuuorteilenn geschickt, lassenn wir vnns dasselbe wie Jrsz damit gehalttenn wolgefallenn, vnnd were der Antzaige derhalbenn nicht nötig gewesenn, Dan wir wol wissenns das Jrsz christlich vorwenndett. Wir vberschickenn euch auch zwantzig Taler, Die Jr Johann Ripensi zu seinem Magisterio zuuorreichenn, wie Jhr gebethenn. Der vberschicktenn bucher halbenn Thun wir vnnsz gnedigst bedanckenn, Vnnd begern gnedigst, Wann weitter was newes ausgehett, Jhr wollet vnns dasselbe vff vnnsernn Costenn mitt Anzeige, was diselbenn gesteenn, zuuerttigenn, Wollenn wir euch das geltt dafur hinwidder gnediglich erlegenn lassenn. Wir wollenn auch die andernn Bucher Ann vnnsere Vniuersitet gein Coppennhagenn woluerwart zuvberschickenn bestellenn. Dasz Woltenn wir euch hinwidder, als vnnserm besunder liebenn vnnd dem wir zu allenn gnadenn vnd gutthen gnaigtt, in gnedigster Antwurt nicht verhalttenn, Vnnd thun vnns, vnnser geliebte gemal, Junge Herschafftenn, Brudere, Reiche, Lannde vnnd Leutte in ewr christlich gebet Vnd Euch götlichem schutz vnnd bewahrunge Empfelenn. Datum vtsupra. Zeddell. Als wir auch anhero in vnnser gelibtenn brudere vnmundigenn Jharenn denn Furstennthumbenn Schleswig, Holstain vnd Stormarn mit Regirung furgestandenn, Vnd. aber itzund vnsere gelibtenn Brudere zu yrenn Mundigenn Jaren gelangtt, habenn wir mit Jhrenn Liebten Erblich geteilt vnnd vnns got zu lobe vnd gemeinem Nutzenn zum pestenn freuntlich, bruderlich vnnd wol vertragenn, Der Almechtige vorlei fernner zu Friede, Liebe vnnd bruderlicher ainigkeit. Amenn. Wir wollenn Euch auch nit verhaltenn, das vnnser geliebter Jungster Bruder
