242
ann Jme, Auch ob vnd wie er zugebrauchenn sey, zutzuschreibenn kein beschwer habenn, Daruf wir vnns gegenn Jme zuerzeigenn. Vnd weil wir auch bericht, Das Magister Jorg Stur sich zum Studio Juris begebenn habenn solle, vnd nicht eracht werdenn magk, Das er darin sunderliche frucht zuschaffenn, So wollet Jr vnns zu gnedigstem gefallenn vnnd Jme zum bestenn miteinradenn, Vnd so zubefindenn, Das es nicht sein gelegenheit, Wiewol wir solchs, do es nicht sein vorterb, woll gernn sehenn, wollet Jr Jme fuglich daruonn Radten, das er sich zum Studio Theologie oder artium wider bege[be]. Achten er werde in denselbenn mit mehrerm nutz vnd Rhum vorfarenn mugenn. Vnd wes also befundenn, das wollet Jr sambt eurem Christlichenn bedenckenn Ann vnns schrifftlich gelangenn, Demnach wir vnns gegenn dennselbenn fernner zuerzeigenn, Woltenn euch solchs Als vnnserm besonder liebenn vnd deme wir mit Besonndernn gnadenn geneigt, gnedigst nicht vorhaltenn, vnnd thun vnns zusambt vnnser gelieptenn gemahel, Jungenn herschafftenn, Reichenn, Landen vnnd Leuthenn Jnn euer Christlich gebet vnd paternoster empfhelenn. Datum vtsupra. 22. Antwordt an Doctor Martinum Lutherum zu Wittembergk, das vberschickte gelt belangen. Datum Arhusen den 3 tag Marcij Anno etc. 1546. Nota. diss letzt schreibenn hat der guthe fromme Luther in dieser welt nicht geleszenn etc. 1546, 3 Marts. Christian etc. Vnsernn gnedigstenn grus zuuorn. Ehrwirdiger vnnd hochgelarter besunder lieber. Ewer Schreibenn habenn wir empfangenn vnd gnedigst vorstandenn. Wehre der dancksage vor das vberschicte geltt ohne noth geweszenn, Dan so wir euch mit grösserm vnnd anderm gnad vnnd gneigten willenn zuerzeigenn wustenn, Thetten wir inn warheit gerne, Vnd ist vnns zu besunderm gefallenn, das euch solchs gerings vonn vnns Annhemblich ist. Verhoffenn zu Gott, er werde euch der Christlichen Kirchenn vnnd vnser wharenn Relligion zu Nutz vnnd furderung noch lange gesundt vnnd lebendig fristenn, das yhr nicht allein diszmal, besondernn noch vil Jar hernacher das vorschriebenn vnnd geringe gelt vonn vnns empfahen werdett. Vnnd bedancken vnns gnedigst der zugeschriebenn zeittungenn. Wollenn nicht zweiueln, wie wir auch embsig darumb bittenn, der allmechtige werde, wie itzundt ann dem von Braunschweyg gnedigst vnnd gewaltig gescheenn, der gotloszenn anschlege vnnd furnhemenn widder seine heillige Kirch vnnd wahre Lehr hyndernn, zu Aschen vnd nichtig machenn vnnd seyne arme kyrch erhaltenn vnnd erretten. Demselben Gott vnnd Vater vnsers heylants Jesu Christi thun wir euch, vnd vns sambt vnnser gliptenn Gemahel, Jungen herschafftenn, Reichen, Landen vnd Leutten in ewr Christlich gebeth vnd Pater Noster emphelen. Datum vtsupra.
