248
27. Ann doctor luters witwenn. kon. Mtt. vberschickenn Jhr funfftzig thaler. Datum Coldingen denn 29 Decembris Anno 1546. 1546, 29 Decbr. Christiann etc. Vnnsern gnedigsten grusz zuuorn. Erbare vnnd vil tugenntsame liebe besondere. Nachdem wir berichtt, das Jhr Jnn Jtzigenn gefarlichenn zeitten nebenn anndern ausz Wittemberk nach Magdeburg gewichenn, habenn wir nichtt vnnderlassenn wollen ann euch zu schreibenn, Euch vnnsern gnedigstenn willenn vnnd neigung zuuormeldenn. Vnnd als Jhr dermassenn, Euer haushaltung vorannderen vnnd euch ann frembdenn Orten erhaldenn mussett, das wir danne ein besunders mittleidenn, Schicken wir euch bej kegennwertigem bothenn dem altenn Schlesier zu ewer haushaltunge funfftzig thaler, die wollett zu gefallenn annemenn vnnd vnnser gnedigste neigunge daraus vormerkenn. Wir wollenn auch Jderzeitt euer gnediger herr sein vnnd vns Jegenn euch zuerzeigenn wissenn. Woltenn euch solchs gnedigst nichtt vorhalten, vnnd seindt euch mitt gnadenn vnnd allem gutenn geneigtt. Datum vtsupra. 28. Anno doctor pommern ein trost briff. Actum Coldingenn denn 30ten Decembris Anno etc. 46ten.. 1546, 30 Decbr. Christiann etc. Vnnsernn gnedigstenn grus zuuorn. Wirdiger vnnd hochgelarter besunder lieber. Wir habenn ewer schreybenn, denn 25 Nouembris zu Wittemberg datirt, bey Slessier denn Bothenn ann vnns gethann, benebenn den vberschicktenn buchern empfangen, Vnnd wes Jr des geldes, Auch diser leuffte halbenn ann vnns gelanngt, fernners Jnnhalts gnedigst vornhommen. Wir habenn Auch die Andernn schreybenn, dauon Jr meldett, vberkommenn, Aber doch erst vor Acht tagenn, ehe dann Schlesier angelanngt, das auch die vrsache, das Jr daruf vnbeantwurthet. Vnnd wollenn euch hinwidder gnedigst nicht vorhaltenn, das wir die gelegennheytt der Krigsleufft, vnnd das Jr dermassenn mit beschwert sein sollet, vnnd sunderlich dass die Schull der heyligenn kyrch zu Nachteil also zurstrewet, ganntz vngerne vermerkt, Tragenn auch deszhalbenn besunders mitleydenn, Wollen aber doch hoffenn vnnd zu dem Allmechtigenn vortrawens sein, wie Auch darumb zu pitten, Es werdenn die Sachenn mit der Rom. Keys. Matt. vnnserm besunder lieben hern vnd ohmenn vnd Herzog Moritzenn zu Andernn vnd frydlichen wegenn gelangenn. Was wir auch darzu guts thun kondtenn, An deme solt vnser vleisz nicht gespart werdenn. Der Allmechtige wird auch sein liebes vnnd heilwertigs worth vnnd Euangelium erhaltenn vnd seyner Armenn kyrch
