249
souil raum vnd platz vberpleybenn lassenn, dar dieselbe zupleybenn vnd zuflucht zuhabenn. Wir woln auch mit gotlicher hulf des liebenn vnd heyligenn Euangelij vnnd vnser wahrenn Christlichenn Relligion ein bestendiger Bekenner bisz an vnser seelig ende pleybenn vnnd sein vnnd vns mit Gotlicher hulff dauon nicht drengenn lassenn. Vnnd als die Sachenn dergestalt furlauffenn, das vnns schmertzlich vnd entkegenn, wollen wir ewer vnnd der Ewern gnedigst Jngedenck seynn vnd vns diselbenn Jder zeit mit gnadenn empholenn sein lassenn. Jr wist vnns auch dermassenn, das wir euch vngernne gelassenn sehen wolten, Des Jr euch zu vnns vngezweifelt zuuorsehen. Der Allmechtige wird auch ewre Person der oblygendenn Last vnnd beschwerung erretten vnnd die Glidtmassenn der heiligen Kyrchenn nicht trostlosz lassenn. Wir habenn auch die vberschicktenn Bucher zu besunderm gnedigstem danck, Hetten nicht vngernne gesehenn, Jr hettet vnns zugeschrybenn, was sie kostenn, vnnd weyll vnns die vonn euch anlangenn, Seind vnns diselbenn sunderlich lieb vnnd angenehm, wollenn sie auch one das, das es sehr hochnottige vnnd nutze bucher sein, vmb ewernt willen behaltenn vnnd ewer darbej Jngedenck sein. Vnsere hertzuilglipte Gemahell, Auch vnnser glipte Sohn vnnd Thochtere, Herzog Fridrich der Printz zu Dennemarkenn vnnd Freulin Anna habenn die Jren zu grossem vnd hohen gefallenn Angenhommenn Vnd seind euch derwegenn hochdanckpar. Wir habenn Auch Ahnn ewren eydam weyll wir aus desselbenn schreybenn vormergkt, das Jhr Ewre gliptenn kyndere mit denselbenn vonn euch Jegenn Zerbst gesanndt, Funffzig Taler zugeschickt zu derselbenn vnderhaltunge, Auch haben wir das bewuste vnd vorgeschrybenn geltt, dauonn Jr meldett, vor langst bey Ern Christoff Anderszon Rittern vberschickt, das Jr numehr empfangenn haben werdet. Es hat vnns auch gedachter Ritter, der disen tagk ann vnns gelanngt, bericht, das er solch gelt vbergeschickt habe. - Vnnd habenn auch vor Ewrem schreybenn hochseligenn doctor Luthers Wytwenn die Funftzigk Thaler mit vberschickenn lassen, Syndt Jr auch fernner vnd den Jren mit gnaden gneigt. Als Jr auch vnnsers zustands halbenn, dauon euch Angelanngt, Als soltenn wir mit Thode abgangenn sein, bericht zu werdenn begerth, Jst es nicht Ahn, das wir aus gnediger schickunge des Allmechtigenn Jnn Jungstem Sommer, Do wir vnns nach Schona begebenn, Mit schwerer Leybs schwachheit befallenn vnnd also mehr dann Sechs wochenn zu Bett gelegenn, Darjnn die Sachenn zweiffelhafftig vnnd dermassenn gestandenn, Das wir vnns Jn gottes gnedigenn willenn Ergeben gehapt vnnd vnnsers seeligenn Abschieds vonn dieser betruebtenn weltt gewertig gewesen, So es des herrenn gnediger will gewesenn. Aber der Allmechtige, der Allein Aus Nothen errettenn kann, hatt vnns, do es Am Eusserstenn gestandenn, Seine gnedige hulf erscheynenn lassenn vnnd vnns, Jme zu Ewigem Lobe vnnd Danck, vnsere gesuntheit hinwidder vorliehenn. Damit wir auch Jnn disenn gefarlichenn zeitten dem Allmechtigenn zu Ehrenn
